బీఆర్ఎస్‌ ముక్కలవ్వడం తథ్యం: రాంచందర్ రావు

విశ్వంభర, తెలంగాణ బ్యూరో: తెలంగాణలో త్వరలో నిర్వహించనున్న మున్సిపల్ ఎన్నికలకు భారతీయ జనతా పార్టీ పూర్తిస్థాయిలో సిద్ధంగా ఉందని రాష్ట్ర బీజేపీ అధ్యక్షుడు ఎన్. రాంచందర్ రావు స్పష్టం చేశారు. శనివారం ఆయన మీడియాతో మాట్లాడుతూ, ఇటీవలి సర్పంచ్ ఎన్నికల్లో పార్టీ శ్రేణులు ప్రదర్శించిన పోరాట స్ఫూర్తిని కొనియాడారు. సుమారు ఐదు వేల సర్పంచ్ స్థానాల్లో బీజేపీ అభ్యర్థులు పోటీ చేశారని, గత ఎన్నికలతో పోలిస్తే ఈసారి పార్టీ గెలుపు శాతం గణనీయంగా పెరిగిందని తెలిపారు. ఇది గ్రామీణ ప్రాంతాల్లో బీజేపీకి ఆదరణ పెరుగుతోందని స్పష్టంగా చూపిస్తోందని ఆయన అభిప్రాయపడ్డారు.

గ్రామస్థాయి నుంచి పట్టణ స్థాయి వరకు పార్టీని బలోపేతం చేయడమే లక్ష్యంగా పనిచేస్తున్నామని రాంచందర్ రావు తెలిపారు. మున్సిపల్ ఎన్నికల్లోనూ అదే ఉత్సాహంతో పోటీ చేస్తామని, ప్రజల మద్దతుతో విజయం సాధిస్తామని విశ్వాసం వ్యక్తం చేశారు. రాష్ట్ర రాజకీయాల్లో బీఆర్‌ఎస్ పార్టీపై తీవ్ర విమర్శలు గుప్పించిన ఆయన, ఆ పార్టీ ప్రజల విశ్వాసాన్ని పూర్తిగా కోల్పోయిందని అన్నారు. అంతర్గత విభేదాలు, అసంతృప్తి కారణంగా బీఆర్‌ఎస్ భవిష్యత్తులో ముక్కలవడం తప్పదని వ్యాఖ్యానించారు.

ముఖ్యమంత్రి రేవంత్ రెడ్డి నాయకత్వంలోని కాంగ్రెస్ ప్రభుత్వ పాలనపై కూడా రాంచందర్ రావు అసంతృప్తి వ్యక్తం చేశారు. కాంగ్రెస్ ప్రభుత్వం అభివృద్ధి కంటే కమీషన్ల రాజకీయాలకే ప్రాధాన్యం ఇస్తోందని ఆరోపించారు. రాష్ట్రంలో జరుగుతున్న అభివృద్ధి పనులకు అవసరమైన నిధులు ఎక్కువగా కేంద్ర ప్రభుత్వం నుంచే వస్తున్నాయని, అయినప్పటికీ కాంగ్రెస్ కేంద్ర ప్రభుత్వ పథకాలపై తప్పుడు ప్రచారం చేస్తోందని విమర్శించారు.

రాబోయే మున్సిపల్ ఎన్నికల్లో బీజేపీ అభ్యర్థులను గెలిపించి, పట్టణ పాలనలో నిజమైన మార్పు తీసుకురావాలని ప్రజలకు రాంచందర్ రావు పిలుపునిచ్చారు. ప్రజా సమస్యల పరిష్కారమే బీజేపీ లక్ష్యమని ఆయన స్పష్టం చేశారు.