తెలంగాణకు మరో 'అమృత్' కానుక

విశ్వంభర, తెలంగాణ బ్యూరో: దక్షిణ భారత ప్రయాణికుల చిరకాల వాంఛ నెరవేరుస్తూ కేంద్ర రైల్వే శాఖ తెలంగాణకు మరో అమృత్ భారత్ ఎక్స్‌ప్రెస్‌ను కేటాయించింది. భాగ్యనగరంలోని అత్యాధునిక చర్లపల్లి జంక్షన్ నుండి కేరళ రాజధాని తిరువనంతపురం మధ్య ఈ సూపర్ ఫాస్ట్ రైలు పరుగులు తీయనుంది. శుక్రవారం ఉదయం తిరువనంతపురం వేదికగా ప్రధానమంత్రి నరేంద్ర మోదీ ఈ నూతన రైలు సర్వీసును వర్చువల్ పద్ధతిలో ప్రారంభించనున్నారు.

రెండు రాష్ట్రాల మీదుగా సాగే ప్రయాణం
సాధారణ ప్రయాణికులకు సైతం అత్యాధునిక వసతులతో కూడిన ప్రయాణాన్ని అందించే లక్ష్యంతో రూపొందించిన ఈ రైలు, తెలుగు రాష్ట్రాల గుండా ప్రయాణిస్తుంది. తెలంగాణలో నల్గొండ, మిర్యాలగూడ స్టేషన్లలో ఆగనుండగా.. ఆంధ్రప్రదేశ్‌లోని సత్తెనపల్లి, గుంటూరు, తెనాలి, బాపట్ల, ఒంగోలు, నెల్లూరు, రేణిగుంట వంటి కీలక స్టేషన్లలో ఈ రైలు ఆగనుంది. దీనివల్ల రెండు రాష్ట్రాల ప్రజలకు ఆధ్యాత్మిక, పర్యాటక ప్రాంతాలకు వెళ్లడం సులభతరం కానుంది.

సమయ వేళలు, షెడ్యూల్
ఈ రైలు తిరువనంతపురంలో ఉదయం 10:45 గంటలకు బయలుదేరి, మరుసటి రోజు సాయంత్రం 4:30 గంటలకు హైదరాబాద్‌లోని చర్లపల్లి జంక్షన్‌కు చేరుకుంటుంది. సుదూర ప్రాంతాలకు వెళ్లే పేద, మధ్యతరగతి ప్రయాణికుల కోసం నాన్-ఏసీ పుష్-పుల్ టెక్నాలజీతో ఈ రైలును రూపొందించారు. ఇది తక్కువ సమయంలో ఎక్కువ వేగంతో ప్రయాణిస్తుంది.

తెలంగాణకు రెండో అమృత్ భారత్
ఇప్పటికే చర్లపల్లి - ముజఫర్‌పూర్ (బీహార్) మధ్య ఒక అమృత్ భారత్ ఎక్స్‌ప్రెస్ విజయవంతంగా నడుస్తోంది. ఇప్పుడు తిరువనంతపురం రైలు రావడంతో తెలంగాణకు రెండో రైలు లభించినట్లయింది. ముజఫర్‌పూర్ రైలు కాజీపేట, పెద్దపల్లి, రామగుండం మీదుగా ఉత్తరాదికి అనుసంధానించగా, తాజా రైలు దక్షిణాది రాష్ట్రాలకు వారధిగా మారనుంది.

ప్రధానికి కిషన్ రెడ్డి కృతజ్ఞతలు
తెలంగాణపై కేంద్రం ప్రత్యేక చొరవ చూపుతోందని, ప్రయాణికుల అవసరాలను గుర్తించి ఈ రైలును కేటాయించినందుకు గాను ప్రధానమంత్రి నరేంద్ర మోదీకి కేంద్రమంత్రి కిషన్ రెడ్డి ప్రత్యేక కృతజ్ఞతలు తెలిపారు. చర్లపల్లి టెర్మినల్ అభివృద్ధి తర్వాత ఇలాంటి మరిన్ని రైళ్లు అందుబాటులోకి వచ్చే అవకాశం ఉందని ఆయన పేర్కొన్నారు.