విశ్వంభర, తంగళ్ళపల్లి : రాజన్న సిరిసిల్ల జిల్లా తంగళ్ళపల్లి మండలం అంకుసాపూర్ గ్రామానికి చెందిన మాజీ ప్రధానోపాధ్యాయుడు వంచ చంద్రారెడ్డి అనారోగ్యంతో శనివారం కన్నుమూశారు. ఆయన మృతితో కుటుంబ సభ్యులు, బంధువులు, గ్రామస్థులు, సహచర ఉపాధ్యాయులు, పూర్వ విద్యార్థులు తీవ్ర విషాదంలో మునిగిపోయారు. ఉపాధ్యాయుడిగా, ప్రధానోపాధ్యాయుడిగా తన సుదీర్ఘ సేవాకాలంలో వంచ చంద్రారెడ్డి విద్యార్థుల విద్యాభివృద్ధితో పాటు క్రీడల ప్రోత్సాహానికి విశేష కృషి చేశారు. పాఠశాలలో క్రమశిక్షణ, నైతిక విలువలు, క్రీడా స్ఫూర్తిని పెంపొందించేందుకు నిరంతరం శ్రమించి ఎందరో విద్యార్థులకు మార్గదర్శకుడిగా నిలిచారు. వేలాది మంది విద్యార్థులకు విద్యాబోధన చేసి, వారిని ఉన్నత స్థానాలకు చేర్చడంలో కీలక పాత్ర పోషించిన ఆయన సేవలు చిరస్మరణీయమని పలువురు పేర్కొన్నారు. సమాజానికి బాధ్యతాయుతమైన పౌరులను అందించడంలో ఆయన చేసిన కృషి అమూల్యమని కొనియాడారు. ఆయన మరణ వార్త తెలిసిన వెంటనే ప్రజాప్రతినిధులు, ఉపాధ్యాయ సంఘాల నాయకులు, గ్రామ పెద్దలు, పూర్వ విద్యార్థులు పెద్ద సంఖ్యలో చేరుకుని భౌతిక కాయానికి నివాళులర్పించారు. కుటుంబ సభ్యులకు ప్రగాఢ సానుభూతి తెలియజేస్తూ, వంచ చంద్రారెడ్డి ఆత్మకు శాంతి చేకూరాలని ప్రార్థించారు. విద్యా రంగంలో విశిష్ట సేవలు అందించిన వంచ చంద్రారెడ్డి మృతి జిల్లా విద్యావర్గాలకు తీరని లోటుగా పలువురు అభిప్రాయపడ్డారు.