విశ్వంభర, హైదరాబాద్ :నగరంలో వైభవంగా జరుగుతున్న ఆషాఢ బోనాల ఉత్సవాల్లో భాగంగా టీపీసీసీ అధ్యక్షులు, ఎమ్మెల్సీ బొమ్మ మహేష్ కుమార్ గౌడ్ దంపతులు భాగ్యనగరంలోని పలు ప్రముఖ అమ్మవారి ఆలయాలను సందర్శించారు. సతీసమేతంగా ఆలయాలకు విచ్చేసిన ఆయనకు ఆయా ఆలయాల అర్చకులు, కమిటీ నిర్వాహకులు పూర్ణకుంభంతో ఘన స్వాగతం పలికారు.ఈ సందర్భంగా మహేష్ కుమార్ గౌడ్ దంపతులు అమ్మవార్లకు ప్రత్యేక పూజలు, అర్చనలు నిర్వహించారు. అనంతరం ఆయన మీడియాతో మాట్లాడుతూ.. తెలంగాణ సంస్కృతి, సంప్రదాయాలకు, విశిష్ట జీవన విధానానికి బోనాల పండుగ ఒక సజీవ ప్రతీక అని కొనియాడారు. శతాబ్దాల చరిత్ర గల ఈ ఉత్సవాలను భక్తులు ఎంతో భక్తిశ్రద్ధలతో జరుపుకోవడం ఆనందదాయకమన్నారు.రాష్ట్ర ప్రజలందరూ ఆయురారోగ్యాలతో, సుఖసంతోషాలతో వర్ధిల్లాలని, అమ్మవారి కరుణాకటాక్షాలతో తెలంగాణ రాష్ట్రం మరింత ప్రగతి పథంలో దూసుకుపోవాలని తాను ప్రార్థించినట్లు టీపీసీసీ చీఫ్ తెలిపారు. నగరంలో నెలకొన్న ఆధ్యాత్మిక వాతావరణాన్ని, భక్తుల కోలాహలాన్ని ఆయన ఈ సందర్భంగా అడిగి తెలుసుకున్నారు. పూజా కార్యక్రమాల అనంతరం ఆలయ పండితులు ఆయనకు తీర్థప్రసాదాలు అందజేసి, వేద ఆశీర్వచనం చేశారు. ఈ కార్యక్రమంలో కాంగ్రెస్ పార్టీ ముఖ్య నాయకులు, కార్యకర్తలు, ఆలయ కమిటీ సభ్యులు మరియు పెద్ద సంఖ్యలో భక్తులు పాల్గొన్నారు.