విశ్వంభర , హుస్నాబాద్: ఆర్టీసీ కార్మికుల సంక్షేమం, ఉద్యోగ భద్రత కల్పించడమే లక్ష్యంగా ఐఎన్‌టీయూసీ పనిచేస్తున్నదని ఆ సంఘం రాష్ట్ర ప్రధాన కార్యదర్శి జక్కుల మల్లేశం అన్నారు. హుస్నాబాద్ ఆర్టీసీ డిపోకు చెందిన పలువురు కార్మికులు తెలంగాణ మజ్దూర్ యూనియన్‌ (టీఎంయూ)కు రాజీనామా చేసి ఐఎన్‌టీయూసీలో చేరారు. ఈ సందర్భంగా మల్లేశం వారికి సంఘం కండువాలు కప్పి స్వాగతించారు.అనంతరం జక్కుల మల్లేశం మాట్లాడుతూ.. ఆర్టీసీ కార్మికుల సంక్షేమానికి ప్రభుత్వం ప్రాధాన్యం ఇస్తున్నదని తెలిపారు. సమ్మె కాలంలో కార్మికులకు ఇచ్చిన హామీలను నెరవేర్చేలా ప్రభుత్వం చర్యలు తీసుకుంటున్నదన్నారు. ఆర్టీసీని ప్రభుత్వంలో విలీనం చేసే ప్రక్రియను కూడా త్వరలో ప్రారంభించేలా ప్రభుత్వం కసరత్తు చేస్తున్నదని పేర్కొన్నారు. కార్మికుల సమస్యల పరిష్కారానికి ఐఎన్‌టీయూసీ నిరంతరం పోరాడుతుందని తెలిపారు. త్వరలో జరగనున్న ఆర్టీసీ గుర్తింపు సంఘం ఎన్నికల్లో ఐఎన్‌టీయూసీకి కార్మికులు అధిక సంఖ్యలో మద్దతు ఇవ్వాలని కోరారు. అన్ని డిపోల్లో ఐఎన్‌టీయూసీ విజయానికి కార్మికులు కృషి చేయాలని పిలుపునిచ్చారు. హుస్నాబాద్ డిపోకు చెందిన ఎం.డి.రెడ్డి, వి.ఎస్.రెడ్డి, పి.ఎస్.గౌడ్, వి.ఆనందం తదితరులు టీఎంయూకు రాజీనామా చేసి ఐఎన్‌టీయూసీలో చేరారు. ఈ కార్యక్రమంలో రాష్ట్ర కార్యవర్గ సభ్యుడు పి.ఆర్.రెడ్డి, జిల్లా రీజినల్ కార్యదర్శి టి.ఆర్.రెడ్డి, అధ్యక్షుడు ఎన్.కె.రాజు, రీజినల్ కోశాధికారి మునీందర్, హుస్నాబాద్ డిపో కార్యదర్శి పి.ఎస్.రెడ్డి, అధ్యక్షుడు కిషోర్, పచ్చిమట్ల శ్రీనివాస్, ఎం.ఆర్.రెడ్డి తదితరులు పాల్గొన్నారు.