విశ్వంభర, ఇబ్రహీంపట్నం: తమ స్వగ్రామమైన రంగారెడ్డి జిల్లా, ఇబ్రహీంపట్నం నియోజకవర్గం, ఎలిమినేడు గ్రామంలో బోనాల పండుగ సందర్భంగా నిర్వహించిన శ్రీశ్రీశ్రీ మహంకాళమ్మ అమ్మవారి బోనాల మహోత్సవంలో జిల్లా బీఆర్ఎస్ పార్టీ అధ్యక్షులు, మాజీ ఎమ్మెల్యే మంచిరెడ్డి కిషన్ రెడ్డి పాల్గొని ప్రత్యేక పూజలు చేశారు. అమ్మవారి ఆలయానికి చేరుకున్న కిషన్ రెడ్డి గారికి గ్రామ పెద్దలు, మహిళలు సంప్రదాయ పద్ధతిలో స్వాగతం పలికారు. అనంతరం అమ్మవారికి పట్టు వస్త్రాలు సమర్పించి, బోనం సమర్పించి ప్రత్యేక పూజలు నిర్వహించారు. ఈ సందర్భంగా మంచిరెడ్డి కిషన్ రెడ్డి గారు మాట్లాడుతూ "మహంకాళమ్మ అమ్మవారి ఆశీస్సులు ఎల్లప్పుడూ గ్రామ ప్రజలపై ఉండాలని, ప్రతి ఒక్కరూ సుఖసంతోషాలతో, ఆయురారోగ్యాలతో ఉండాలని అమ్మవారిని ప్రార్థించాను. తెలంగాణ సంస్కృతికి, ఆచారాలకు ప్రతీక అయిన బోనాల పండుగను మనమందరం కలిసికట్టుగా జరుపుకోవాలి. గ్రామ అభివృద్ధికి, ప్రజా సంక్షేమానికి బీఆర్ఎస్ పార్టీ ఎల్లప్పుడూ కృషి చేస్తుంది" అని తెలిపారు. బోనాల సందర్భంగా గ్రామమంతా కోలాహలంగా ఉంది. మహిళలు సంప్రదాయ దుస్తుల్లో బోనాలు, పూజా సామాగ్రితో అమ్మవారి ఆలయానికి క్యూ కట్టారు. డప్పు చప్పుళ్లు, పోతురాజుల నృత్యాలు వాతావరణాన్ని భక్తిమయంగా మార్చాయి. ఈ మహోత్సవంలో  గ్రామ ప్రజా ప్రతినిధులు, బీఆర్ఎస్ పార్టీ నాయకులు, కార్యకర్తలు, యువత, మహిళలు పెద్ద సంఖ్యలో పాల్గొన్నారు. కార్యక్రమం అనంతరం భక్తులకు అన్నదానం నిర్వహించారు. అమ్మవారి ఆశీస్సులతో గ్రామం సుభిక్షంగా ఉండాలని, రైతులు పంటలు బాగా పండాలని ప్రజలు మొక్కులు చెల్లించుకున్నారు.