గ్రామ పంచాయతీలకు ‘సంక్రాంతి’ కానుక!

విశ్వంభర, తెలంగాణ బ్యూరో: రాష్ట్రంలోని గ్రామ పంచాయతీలకు ప్రభుత్వం సంక్రాంతి కానుక అందించింది. పల్లెల అభివృద్ధి, స్థానిక అవసరాల కోసం ఏకంగా రూ. 277 కోట్ల భారీ నిధులను విడుదల చేస్తూ రాష్ట్ర ప్రభుత్వం కీలక నిర్ణయం తీసుకుంది. ఈ మేరకు ఆర్థిక శాఖ ఉత్తర్వులు జారీ చేసింది. డిప్యూటీ సీఎం, ఆర్థిక శాఖ మంత్రి మల్లు భట్టి విక్రమార్క ఆదేశాల మేరకు ఈ నిధులు మంజూరయ్యాయి. పండుగ పూట గ్రామాల్లో పారిశుధ్యం, మౌలిక వసతులు, ఇతర అత్యవసర పనులకు నిధుల కొరత ఉండకూడదనే ఉద్దేశంతో ప్రభుత్వం ఈ చర్యలు చేపట్టింది. ఈ సందర్భంగా రాష్ట్రంలోని సర్పంచ్‌లకు, వార్డు సభ్యులకు, గ్రామ ప్రజాప్రతినిధులకు భట్టి విక్రమార్క సంక్రాంతి శుభాకాంక్షలు తెలిపారు. 

పెండింగ్ పనులకు మోక్షం.. 
గత కొంతకాలంగా నిధుల కోసం ఎదురుచూస్తున్న గ్రామ పంచాయతీలకు ఈ విడుదలైన సొమ్ము పెద్ద ఊరటనివ్వనుంది. ఈ నిధులతో గ్రామాల్లో పెండింగ్‌లో ఉన్న చిన్నపాటి అభివృద్ధి పనులు పూర్తి కానున్నాయి. పంచాయతీల రోజువారీ నిర్వహణ ఖర్చులకు వెసులుబాటు కలుగుతుంది. పారిశుధ్య కార్మికుల వేతనాలు, ఇతర అత్యవసర చెల్లింపులకు మార్గం సుగమం కానుంది. ప్రభుత్వం తీసుకున్న ఈ నిర్ణయం పట్ల స్థానిక సంస్థల ప్రతినిధులు హర్షం వ్యక్తం చేస్తున్నారు. పండుగ వేళ నిధులు విడుదల చేయడం వల్ల గ్రామాల్లో పనులు వేగవంతం అవుతాయని వారు ఆశాభావం వ్యక్తం చేశారు.