విశ్వంభర,నేషనల్ బ్యూరో: దేశ భద్రతను మరింత పటిష్టం చేయడానికి ఆధునిక యుద్ధ వ్యూహాలకు అనుగుణంగా ప్రత్యేక రాకెట్ ఫోర్స్ కమాండ్ ఏర్పాటు చేయాల్సిన అవసరం ఉందని భారత సైన్యాధ్యక్షుడు జనరల్ ఉపేంద్ర ద్వివేది అభిప్రాయపడ్డారు. మారుతున్న అంతర్జాతీయ భద్రతా పరిస్థితులు, సాంకేతిక పరిణామాలను దృష్టిలో పెట్టుకుని ఇలాంటి వ్యవస్థ వ్యూహాత్మకంగా అత్యంత కీలకమని ఆయన పేర్కొన్నారు. ఆర్మీ డే సందర్భంగా మంగళవారం మీడియాతో మాట్లాడిన సందర్భంగా ఆయన ఈ వ్యాఖ్యలు చేశారు.
నేటి యుద్ధ రంగంలో రాకెట్లు మరియు మిసైళ్ల మధ్య తేడా గణనీయంగా తగ్గిపోయిందని, రెండూ యుద్ధ ఫలితాలను నిర్ణయించే స్థాయిలో ప్రభావవంతంగా మారాయని జనరల్ ద్వివేది వివరించారు. చైనా, పాకిస్థాన్ వంటి పొరుగుదేశాలు ఇప్పటికే ప్రత్యేక రాకెట్ ఫోర్స్లను ఏర్పాటు చేసి తమ దాడి సామర్థ్యాలను బలోపేతం చేసుకున్నాయని చెప్పారు. ఈ నేపథ్యంలో భారత్ కూడా సమకాలీన సవాళ్లకు తగినట్లుగా ముందడుగు వేయాల్సిన అవసరం ఉందని ఆయన నొక్కిచెప్పారు. ఈ లక్ష్యంతో భారత సైన్యం దీర్ఘ శ్రేణి దాడి సామర్థ్యాలను వేగంగా అభివృద్ధి చేస్తోందని తెలిపారు.
స్వదేశీ సాంకేతికతతో అభివృద్ధి చేసిన పినాకా రాకెట్ వ్యవస్థను ప్రస్తుతం 120 కిలోమీటర్ల పరిధితో విజయవంతంగా పరీక్షించామని, దాని శ్రేణిని 150 కిలోమీటర్ల వరకు పెంచేందుకు ఇప్పటికే ఒప్పందాలు కుదిరాయని ఆయన వెల్లడించారు. భవిష్యత్తులో పినాకా శ్రేణిని 300 నుంచి 450 కిలోమీటర్ల వరకు విస్తరించే లక్ష్యంతో సైన్యం పని చేస్తోందని చెప్పారు. పినాకా, ప్రళయ్, బ్రహ్మోస్ వంటి శక్తివంతమైన ఆయుధ వ్యవస్థలను ఒకే కమాండ్లో సమన్వయం చేస్తూ ప్రత్యేక రాకెట్ ఫోర్స్ కమాండ్ను ఏర్పాటు చేయాలని ఆయన ప్రతిపాదించారు.
ఇటీవల జరిగిన ‘ఆపరేషన్ సిందూర్’పై స్పందించిన జనరల్ ద్వివేది, పాకిస్థాన్ నుంచి వచ్చిన అణు బెదిరింపులు రాజకీయ స్థాయిలో మాత్రమే వినిపించాయని, సైనిక స్థాయిలో అలాంటి అంశాలు ఎక్కడా చర్చకు రాలేదని స్పష్టం చేశారు. ఆ ఆపరేషన్ సమయంలో భారత దళాలు కేవలం 88 గంటల్లోనే భూతల దాడులకు పూర్తి స్థాయిలో సిద్ధమయ్యాయని, పాకిస్థాన్కు గణనీయమైన నష్టం కలిగించాయని గుర్తుచేశారు. ఈ పరిణామాల అనంతరం పాకిస్థాన్ కూడా ప్రత్యేక రాకెట్ ఫోర్స్ ఏర్పాటు దిశగా ఆలోచన చేస్తున్నట్లు సమాచారం వస్తోందని ఆయన తెలిపారు.
