విశ్వంభర, ఓరుగల్లు :-ఓంకార నాదమే ఆదిస్వరమై, సంగీతమే సరస్వతీ స్వరూపమై, మానవసేవే మాధవసేవ అనే మహోన్నత సందేశాన్ని మధురగానామృతంగా లోకానికి అందించిన గాన గంధర్వుడు, అమరజీవి శ్రీ ఎస్. పి. బాలసుబ్రహ్మణ్యం గారికి, గానకోకిల, అమరజీవి శ్రీమతి ఎస్. జానకి గారి మధురస్మృతులకు అక్షరాంజలి ఘటిస్తూ... కళను ఆరాధించే హృదయాల సమక్షంలో నిర్వహిస్తున్న ఈ "స్వరాభిషేకం" మహోత్సవ వేదికపై, సేవకు సార్థకతను, సౌజన్యానికి సౌందర్యాన్ని, మానవత్వానికి మహిమాన్వితమైన అర్థాన్ని అందించిన మహనీయులు శ్రీ ఈగ మల్లేశం గారిని ఘనంగా సత్కరించుకోవడం మా జన్మధన్యమని భావిస్తున్నాము.
ప్రపంచంలో ప్రతి మనిషి జన్మిస్తాడు... కానీ కొంతమంది మాత్రమే జన్మకు జన్మార్థాన్ని అందిస్తారు. ప్రతి కుటుంబంలో ఒక బిడ్డ పుడతాడు... కానీ కొన్ని గృహాల గడప దాటి సమాజానికే ఆశాకిరణమై అవతరించే మహనీయులు అరుదుగా జన్మిస్తారు. అటువంటి అరుదైన ఆణిముత్యమే... ఈ ఈగ మల్లేశం గారు.
.
ఒక జాతికి జ్యోతిగా... ఒక సమాజానికి స్ఫూర్తిగా...ఒక కళాకారునికి ఆత్మబంధువుగా...ఒక నిరుపేదకు భరోసాగా...ఒక నాయకుడికి ఆదర్శంగా...ఒక మనిషికి మానవత్వానికి ప్రతిరూపంగా అవతరించిన మహోన్నత వ్యక్తిత్వాన్ని ఈ భూమికి ప్రసాదించిన అమరజీవి ఈగ రాజమ్మ - శ్రీ వెంకటమల్లు పుణ్యదంపతులు ఎంతటి తపస్సు చేశారో, ఎంతటి పుణ్యఫలాన్ని కూడబెట్టారో విధాతకే తెలియాలి. ఆ దివ్యసంకల్పానికి అర్థాంగిగా జతకట్టిన శ్రీమతి సంగీత గారి ప్రేమ, ప్రోత్సాహం, సహనం, సహకారం, అండదండలు ఆయన సేవా ప్రస్థానానికి అచంచలమైన శక్తిగా నిలిచి, ఈగ మల్లేశం గారిని వ్యక్తిత్వంగా, నాయకత్వానికి నిదర్శనంగా, సేవకు చిరునామాగా, సమాజం గర్వించే మహోన్నత మహనీయునిగా తీర్చిదిద్దాయి.

అగస్త్య మహర్షి గోత్ర పవిత్రతను వారసత్వంగా పొందిన మీ జననం 1966 ఫిబ్రవరి 14న జరిగిన ఒక కుటుంబ శుభసందర్భం మాత్రమే కాదు... అది వేలాది జీవితాలకు వెలుగునిచ్చే ఒక సేవాయుగానికి శ్రీకారం. పసితనంలోనే మీకు ఐలోని శ్రీ మల్లన్న స్వామి పేరును నామకరణం చేయడం యాదృచ్ఛికం కాదు. ఆ దివ్యనామం వెనుక దైవసంకల్పం దాగి ఉంది. "మల్లేశం" అనే ఆ పేరు, కాలక్రమంలో వేలాది హృదయాల్లో విశ్వాసంగా, ఆపన్నులకు ఆధారంగా, కళాకారులకు ఆత్మీయ ఆశ్రయంగా, సమాజానికి సేవా ప్రతీకగా మారుతుందని ఆ రోజున ఎవరికీ తెలియకపోయినా... కాలమే ఆ సత్యాన్ని చాటిచెప్పింది.

బాల్యంలో ఎదురైన ఒడిదుడుకులు మీ అడుగులను ఆపలేకపోయాయి... కాలం విసిరిన పరీక్షలు మీ ఆత్మవిశ్వాసాన్ని దెబ్బతీయలేకపోయాయి... కష్టాలు మీ హృదయాన్ని కఠినం చేయలేదు, అవి మీలో కరుణను పెంచాయి... అవమానాలు మిమ్మల్ని వెనక్కి నెట్టలేదు, అవి మీ వ్యక్తిత్వాన్ని మరింత ఉన్నత శిఖరాలకు చేర్చాయి.

ఎదగడం గొప్ప కాదు, ఎదుగుతూ ఎందరినో పైకి తీసుకెళ్లడం గొప్ప. సంపాదించడం విశేషం కాదు, సంపాదించిన దానిలో సమాజానికి వాటా ఇవ్వడం విశిష్టం. పదవులు పొందడం అసాధారణం కాదు, పదవులకు పరమార్థాన్ని చేకూర్చడం మహోన్నతం. ఈ మహోన్నత లక్షణాలన్నింటికీ సజీవ సాక్ష్యంగా నిలిచిన మీ జీవితం, ఒక వ్యక్తి విజయగాథ మాత్రమే కాదు... సేవతో శిఖరాలను అధిరోహించిన సజీవ ప్రేరణాగ్రంథం.

అందుకే ఈ రోజు మేము ఒక వ్యక్తిని సన్మానించడం లేదు, ఒక విలువకు వందనం చేస్తున్నాము, ఒక సేవా తత్వానికి శిరస్సు వంచుతున్నాము, ఒక మానవతా ప్రవాహానికి మంగళహారతి ఇస్తున్నాము, ఒక మహోన్నత జీవన గాథకు మా హృదయపూర్వక అభినందనలను అక్షరమాలలుగా సమర్పిస్తున్నాము.

ప్రజల విశ్వాసమే రాజకీయానికి ప్రాణమైతే, సేవాసంకల్పమే నాయకత్వానికి ప్రాణవాయువు. ఆ విశ్వాసాన్ని వమ్ము చేయకుండా, ఆ సంకల్పాన్ని ఎన్నడూ విడిచిపెట్టకుండా సాగిన మీ ప్రజాప్రస్థానం నేటి తరానికి ఆదర్శనీయం. తెలుగుదేశం పార్టీ ఆవిర్భావం నుంచే మహానేత, విశ్వవిఖ్యాత నటసార్వభౌముడు, మాజీ ముఖ్యమంత్రి శ్రీ నందమూరి తారక రామారావు గారి ఆశయాలను హృదయంలో నాటుకుని, ఆలిండియా అభిమాన సంఘం గౌరవ అధ్యక్షులుగా నాలుగు దశాబ్దాలకు పైగా ప్రజాజీవితంలో అచంచలంగా కొనసాగడం మీ నిబద్ధతకు నిదర్శనం. పదవులను అలంకరించడం కాదు... పదవులకు ప్రజోపయోగ పరిమళాన్ని అద్దడమే మీ రాజకీయ తత్వం.

ఆ మహోన్నత ప్రజాసేవా దృక్పథానికే గుర్తింపుగా కేంద్ర ఖాదీ మరియు చిన్న పరిశ్రమల సంస్థకు డైరెక్టర్‌గా బాధ్యతలు నిర్వహించి, గ్రామీణాభివృద్ధి, కుటీర పరిశ్రమలు, స్వయం ఉపాధి రంగాలకు మీవంతు విశిష్ట సేవలందించారు. అలాగే స్వాతంత్ర్య సమరయోధుల వారసుల సంఘం రాష్ట్ర అధ్యక్షులుగా స్వాతంత్ర్య సమరయోధులకు అండగా వుండి వారి కష్టసుఖాలలో నీడగా నిలిచారు. నేడు ఉభయ తెలుగు రాష్ట్రాల కళాకారుల సంక్షేమ మండలి అధ్యక్షునిగా సమాజంలోని వివిధ వర్గాల సంక్షేమం, కళాకారుల శ్రేయస్సు, సామాజిక అభ్యున్నతికి నిరంతరం కృషి చేస్తూ, పదవిని అధికారానికి ప్రతీకగా కాక, సేవకు సాధనంగా మలచిన మహనీయునిగా ప్రజల ప్రశంసలు అందుకుంటున్నారు.

అఖిల భారత పద్మశాలి జాతీయ అధ్యక్షునిగా, బాధ్యతలు స్వీకరించిన నాటి నుండి, పద్మశాలి సమాజ అభ్యున్నతినే జీవిత ధ్యేయంగా మలచుకున్నారు. వివిధ రాష్ట్రాలలోని చేనేత కుటుంబాల కన్నీటిని తుడవాలనే సంకల్పంతో ముందడుగు వేసి, మహారాష్ట్రలోని భీమండిలో తదితర ప్రాంతాల నుండి తన ఖర్చుతో సమీకరించి  పునరావాసం కల్పించేదుకు వలసను తగ్గించేందుకు సమాజ శ్రేయస్సు ఆకాంక్షించిన, మీ విశాల హృదయం, మీ దాతృత్వం చరిత్రలో సువర్ణాక్షరాలతో లిఖించదగిన అధ్యాయం.

వేల సంఖ్యల్లో నిరుపేద యువజంటల వివాహాలకు కుటుంబ పెద్దగా వుండి వారికి ఘనంగా ఆర్థిక సహాయం అందించి, వారి కొత్త జీవితాలకు మంగళహారతిగా నిలిచారు. అనాథల కన్నీటిలో ఆనందాన్ని, నిరుపేదల నిట్టూర్పుల్లో ఆశను, అభాగ్యుల జీవితాల్లో ఆత్మవిశ్వాసాన్ని నింపిన మీ దానగుణం, ధనాన్ని మించిన ధర్మాన్ని చాటిచెప్పింది.

వేల సంఖ్యల్లో నిరుపేద కళాకారులకు ప్రోత్సాహం, ప్రభుత్వ పింఛన్లు అందేలా కృషి చేయడం,  అనేకమంది విద్యార్థులకు విద్య అభ్యసించేందుకు విద్యాసహాయం అందించడం, పేదలకు గృహనిర్మాణ సహాయం చేయడం, ఆపదలో ఉన్నవారికి అండగా నిలవడం - ఇవి గణాంకాలు మాత్రమే కావు, వేలాది కుటుంబాల జీవితాల్లో మీరు వెలిగించిన ఆశాదీపాలు.

కరోనా మహమ్మారి మానవాళిని ముంచెత్తిన విపత్కర సమయంలో, సురభి కళాకారులతో, లిపిలేని కళాకారులతో  పాటు నిరుపేద ప్రజలకు ఆహారం, నిత్యావసర వస్తువులు, ఆర్థిక సహాయం అందించి, "ఆపదలో తోడు నిలిచినవాడే ఆత్మీయుడు" అనే మాటకు జీవం పోశారు. ఆ సంక్షోభ కాలంలో మీ సేవలు, అనేక కుటుంబాలకు ఊపిరిగా నిలిచాయి.
కాలగర్భంలో కలిసిపోతున్న లిపిలేని జానపద కళారూపాలకు పునర్జీవం పోయడం, మరుగునపడిన కళాకారులను వెలుగులోకి తీసుకురావడం, వారి గౌరవప్రద జీవనానికి కృషి చేయడం ద్వారా కళను కేవలం వినోదంగా కాక, సంస్కృతికి శాశ్వత శిలాఫలకంగా నిలబెట్టారు.

తెలంగాణ సాధన ఉద్యమంలో ఉద్యమ జ్వాలలు ఉవ్వెత్తున ఎగసిపడుతున్న వేళ, పెద్దన్న పాత్ర వహించి ప్రజల్లో ఉద్యమస్ఫూర్తిని రగిలించి "దూంధాం" కార్యక్రమానికి ప్రప్రథమంగా శ్రీకారం చుట్టిన ఘనత మీది. రాష్ట్ర రాజకీయ పార్టీల యువజన సంఘాల సంయుక్త కార్యాచరణ కమిటీ (జేఏసీ) తొలి కన్వీనర్‌గా ఉద్యమ చరిత్రలో మీకంటూ చెరగని ముద్ర వేశారు.
వరంగల్ నేల మిమ్మల్ని నాయకుడిగా మాత్రమే కాదు... కళాకారుల పెద్దన్నగా ఆరాధించింది. ఉభయ తెలుగు రాష్ట్రాల కళాకారులు మిమ్మల్ని కేవలం పరిచయం ఉన్న వ్యక్తిగా కాదు... ఆపదలో ముందుగా గుర్తొచ్చే ఆత్మీయుడిగా భావించడం, మీ వ్యక్తిత్వానికి లభించిన అత్యున్నత గౌరవం. నటుడిగా పలు నాటకాలలో నటించి, పలు ప్రముఖ చలనచిత్రాలకు రచయితగా సేవలందించి, గాయకుడిగా కళను జీవిత ధర్మంగా, ప్రజాసేవను జీవిత కర్తవ్యంగా మలచుకున్న మీ బహుముఖ ప్రజ్ఞ నిజంగా అనితరసాధ్యం.

అందుకే మీ పేరు ఒక వ్యక్తి పేరు కాదు... ఒక విశ్వాసం... ఒక భరోసా... ఒక సేవా సంప్రదాయం... ఒక సామాజిక చైతన్యం... ఒక మానవతా మహోద్యమం.
ఈ నాటి  అమరగాయకుల ఈ పాటల పూదోటలో పవిత్ర స్మృతులను హృదయంలో నిలుపుకుంటూ నిర్వహిస్తున్న ఈ "స్వరాభిషేకం" మహోత్సవ వేదికపై, కళను కాపాడినవారిని... కళాకారులను కంటికి రెప్పలా కాపాడినవారిని... మానవత్వాన్ని మనుగడగా మలిచిన మహోన్నత సేవామూర్తిని సత్కరించడం ఈ సభకు లభించిన అపూర్వ గౌరవం. మల్లేశం గారూ! మీరు కళాకారులకు అందించిన సహాయం కేవలం ఆర్థిక బలం కాదు, అది వారి ఆత్మవిశ్వాసానికి అండగా నిలిచిన అభయహస్తం. మీరు పేదలకు అందించిన చేయూత కేవలం దానం కాదు, అది మానవత్వానికి చేసిన మహాయజ్ఞం. మీరు విద్యార్థులకు చెల్లించిన ఫీజులు కేవలం విద్యా సహాయం కాదు, అవి భవిష్యత్తు తరాలకు వెలిగించిన జ్ఞానజ్యోతులు. మీరు జరిపించిన వివాహాలు కేవలం సామాజిక కార్యక్రమాలు కాదు, అవి ఎన్నో కుటుంబాల జీవితాల్లో వెలిగించిన శుభమంగళ దీపాలు. మీరు ఆదరించిన కళాకారులు కేవలం వ్యక్తులు కాదు, తెలుగు సంస్కృతికి జీవం పోసే శాశ్వత కళాదీపాలు.

అందుకే... మీరు నడిచిన దారిలో సేవ పరిమళిస్తుంది, మీరు పలికిన మాటలో ఆత్మీయత ప్రతిధ్వనిస్తుంది, మీరు చాచిన చేతిలో కరుణ ప్రవహిస్తుంది, మీరు నిలిచిన చోట మానవత్వం తలెత్తుకొని నిలుస్తుంది.
పదవులు కాలంతో మారిపోతాయి, పేర్లు తరాలతో మరుగునపడతాయి, సంపదలు కాలగర్భంలో కలిసిపోతాయి... కానీ సేవతో సంపాదించిన గౌరవం యుగయుగాల పాటు నిలిచిపోతుంది. అటువంటి చిరస్మరణీయ గౌరవాన్ని ప్రజల హృదయాల్లో శాశ్వతంగా లిఖించుకున్న మహోన్నత వ్యక్తిత్వం శ్రీ ఈగ మల్లేశం గారు. మీ జీవిత ప్రస్థానం ప్రజాసేవకు ఒక పాఠ్యగ్రంథం, కళాసేవకు ఒక ప్రేరణా గీతం, దాతృత్వానికి ఒక దివ్య దర్శనం, మానవత్వానికి ఒక మహోన్నత సందేశం, భావితరాలకు ఒక దిక్సూచి.
ఈ పవిత్ర సందర్భంలో... గాన సరస్వతికి వినయపూర్వక అక్షరాంజలి ఘటిస్తూ... సేవను శ్వాసగా, సమాజాన్ని కుటుంబంగా, కళాకారులను ఆత్మీయులుగా, ప్రజల ప్రేమను పరమపురస్కారంగా భావించిన మహనీయులు శ్రీ ఈగ మల్లేశం గారికి మా హృదయపూర్వక కృతజ్ఞతాభివందనాలతో, అఖండ గౌరవంతో, అపార అభిమానంతో, ఈ "స్వరాభిషేకం" వేదిక సాక్షిగా ఈ ఘన సన్మాన పత్రాన్ని వినమ్రంగా సమర్పిస్తున్నాము.

మీ సేవల సుగంధం యుగయుగాల పాటు పరిమళించాలి, మీ కీర్తి కిరణాలు తరతరాలను ప్రకాశింపజేయాలి, మీ ఆయురారోగ్యాలు అష్టైశ్వర్యాలతో విరాజిల్లాలి, మీ జీవితం మరెందరికో స్ఫూర్తి సౌధంగా నిలవాలి... ఇదే మా ఆకాంక్ష, ఇదే మా అభినందన...
.............
ఓరుగల్లు స్వరాభిషేకం కమిటి 
హనుమకొండ.