మరో స్వాతంత్ర్య పోరాటం మన తెలంగాణ ఉద్యమం: కేటీఆర్ 

తెలంగాణ రాష్ట్ర ఆవిర్భావ దినోత్సవాన్ని పురస్కరించుకుని మాజీ మంత్రి కేటీఆర్ ఇవాళ(ఆదివారం) ఎక్స్ వేదికగా ట్వీట్ చేశారు. దశాబ్దాల స్వరాష్ట్ర కలను సాకారం చేసుకొని దశాబ్దం గడిచిన సందర్భమిదని గుర్తుచేశారు. ఆధునిక భారతం కళ్లరా చూసిన.. మరో స్వాతంత్ర్య పోరాటం మన తెలంగాణ ఉద్యమమని వ్యాఖ్యానించారు. ఒక్కపలచని, ఉక్కు సంకల్పం కలిగిన కేసీఆర్ పోరాట ఫలితమిదని తెలిపారు.

అమరవీరుల ప్రాణత్యాగాల పునాదులపై ఏర్పడిన కొత్త రాష్ట్రం మనదని, సబ్బండ వర్గాలు కొట్లాడి, పొట్లాడి మా రాష్ట్రం మాకంటూ సాధించుకున్న ప్రత్యేక రాష్ట్రమిదని పేర్కొన్నారు. 60 ఏళ్ల విధ్వంస గాయాలను పదేళ్ల వికాసంతో మాన్పేసుకున్న ఘనకీర్తి మన తెలంగాణదిఅని తెలిపారు. పాలన చేతకాదంటూ నొసటితో వెక్కిరించిన వాళ్లే మనసు నిండా ప్రశంసించిన దశాబ్దమిదని వెల్లడించారు.

‘తెలంగాణ ఆచరిస్తుంది.. దేశం అనుసరిస్తుందనేలా... అనితర సాధ్యంగా సాగింది ఈ దశాబ్ద ప్రయాణం. శతాబ్దంలో సాధ్యంకాని అద్భుతాలు.. దశాబ్దంలో చేసి చూపింది మన తెలంగాణ. నాడు కరవు, రాళ్లురప్పాల, కల్లోలిత తెలంగాణ. నేడు పచ్చని, సుభిక్షమైన కోటి రతనాల వీణ నా తెలంగాణ. అంటూ రాసుకొచ్చారు. ‘అదే స్ఫూర్తి, అదే సంకల్పం ఇకముందు ఉండాలని తెలంగాణ దేశానికి దిక్సూచిగా కొనసాగాలని ఆకాంక్షిస్తూ ప్రతి ఒక్కరికి తెలంగాణ దశాబ్ది ఉత్సవ శుభాకాంక్షలు. జై తెలంగాణ...జైజై తెలంగాణ..’ అంటూ కేటీఆర్ ట్వీట్ చేశారు.