విశ్వంభర, నెల్లికుదురు: ప్రజారోగ్యానికి తీవ్ర విఘాతం కలిగించే గుడుంబా తయారీ, రవాణా, విక్రయాలపై మహబూబాబాద్ జిల్లాలో ఎస్పీ శబరీష్ ఆదేశాల మేరకు ప్రత్యేక నిఘా కొనసాగుతోంది. ఇందులో భాగంగా నెల్లికుదురు ఎస్సై చిర్ర రమేష్ బాబు ఆధ్వర్యంలో పోలీసులు మండలంలోని కాస్య తండా శివారు ధర్మ తండాలో మెరుపు దాడులు నిర్వహించారు. ఈ సందర్భంగా ఎస్సై రమేష్ బాబు మాట్లాడుతూ సంబంధిత ప్రత్యేక దాడులు,సోదాలలో రాష్ట్ర ప్రభుత్వం నిషేధించిన 50 లీటర్ల గుడుంబా, గుడుంబా తయారీ కోసం నిలువ ఉంచిన 1,000 లీటర్ల బెల్లం పానకం గుర్తించి స్వాధీనం చేసుకొని అక్కడికక్కడే ధ్వంసం చేసినట్లు తెలిపారు. వీటి విలువ సుమారు రూ.30 వేలు ఉంటుందని చెప్పారు. ఈ కేసులో అదే తండాకు చెందిన బానోతు నరేష్,బానోతు సురేష్ లపై కేసు నమోదు చేసి దర్యాప్తు చేస్తున్నట్లు ఎస్సై వివరించారు. నిషేధిత గుడుంబా తయారుచేసిన విక్రయించిన, బెల్లం అమ్మకానికి పాల్పడటం వంటి అక్రమ కార్యకలాపాలకు పాల్పడితే కఠిన చర్యలు తీసుకుంటామని హెచ్చరించారు. గుడుంబా నిర్మూలన చర్యలు నిరంతరం కొనసాగుతాయని ఎస్ఐ తెలిపారు.