విశ్వంభర, నేషనల్ బ్యూరో: ఇరాన్లో గత రెండు వారాలుగా కొనసాగుతున్న నిరసనలు ఇప్పుడు దేశాన్ని కుదిపేసే స్థాయికి చేరుకున్నాయి. ఈ ఆందోళనల్లో భద్రతా సిబ్బందితో పాటు సామాన్య ప్రజలు కూడా పెద్ద సంఖ్యలో ప్రాణాలు కోల్పోయినట్లు తాజాగా ఒక సీనియర్ ఇరానియన్ అధికారి వెల్లడించారు. రాయిటర్స్ వార్తా సంస్థతో మాట్లాడిన ఆయన, ఇప్పటివరకు దాదాపు 2,000 మంది మరణించారని తెలిపారు. ఇంత భారీ సంఖ్యలో మరణాలు సంభవించాయని ఇరాన్ ప్రభుత్వం అధికారికంగా అంగీకరించడం ఇదే తొలిసారి కావడం గమనార్హం. అయితే మృతుల్లో ఎంతమంది పౌరులు, ఎంతమంది భద్రతా బలగాల సిబ్బంది ఉన్నారనే వివరాలను మాత్రం వెల్లడించలేదు.
దేశంలో తీవ్ర ఆర్థిక సంక్షోభం, పెరుగుతున్న ద్రవ్యోల్బణం, స్థానిక కరెన్సీ రియాల్ విలువ భారీగా పడిపోవడం వంటి కారణాలతో ప్రజలు ఆగ్రహంతో రోడ్లపైకి వచ్చారు. ఈ నిరసనలు 2025 డిసెంబర్ 28న తెహ్రాన్లోని గ్రాండ్ బజార్లో ప్రారంభమై, తక్కువ సమయంలోనే దేశవ్యాప్తంగా ఉన్న 31 రాష్ట్రాలకు విస్తరించాయి. ప్రభుత్వం మాత్రం ఈ హింసాత్మక ఘటనలకు ఉగ్రవాద గుంపులే కారణమని ఆరోపిస్తోంది. ప్రజలతో పాటు భద్రతా సిబ్బందిని లక్ష్యంగా చేసుకుని ఉగ్రవాదులు దాడులు చేశారని పేర్కొంది.
1979 ఇస్లామిక్ విప్లవం తర్వాత అధికారంలోకి వచ్చిన మతపరమైన పాలనకు ఇది గత మూడేళ్లలోనే అతిపెద్ద అంతర్గత సవాలుగా మారిందని రాజకీయ విశ్లేషకులు అభిప్రాయపడుతున్నారు. ఆర్థిక సమస్యలపై ప్రజలు నిరసన వ్యక్తం చేయడం సహజమేనని చెబుతూనే, ప్రభుత్వం కఠిన భద్రతా చర్యలను అమలు చేస్తోంది. ఈ అల్లర్ల వెనుక అమెరికా, ఇజ్రాయెల్ వంటి విదేశీ శక్తుల హస్తం ఉందని ఇరాన్ ప్రభుత్వం ఆరోపణలు చేస్తోంది.
ఇదిలా ఉండగా, గత కొన్ని రోజులుగా దేశవ్యాప్తంగా ఇంటర్నెట్ సేవలను నిలిపివేయడంతో వాస్తవ పరిస్థితులపై సమాచారం బయటకు రావడం కష్టంగా మారింది. అయినప్పటికీ, భద్రతా బలగాలు మరియు నిరసనకారుల మధ్య జరిగిన ఘర్షణలు, కాల్పులకు సంబంధించిన వీడియోలు బయటకు వస్తున్నాయి. ఈ పరిస్థితుల్లో ఇరాన్ ప్రభుత్వం ఇకపై ఎలాంటి నిర్ణయాలు తీసుకుంటుందన్నది దేశీయంగానే కాక అంతర్జాతీయంగా కూడా తీవ్ర ఆసక్తిని రేకెత్తిస్తోంది.
