వారసత్వ వృక్షాలను పరిరక్షించాలి 

విశ్వంభర, మహబూబాబాద్: పర్యావరణ అవగాహన, సాంస్కృతిక వారసత్వాన్ని ప్రోత్సహించే ఒక విశిష్టమైన చొరవలో భాగంగా,  జిల్లా కేంద్రంలోని  ఎన్ఆర్ఆర్ ప్రభుత్వ డిగ్రీ కళాశాల ప్రాంగణంలో ఉన్న పురాతన రావి చెట్టును  ఆ సంస్థ యొక్క “మాతృ వృక్షం”గా అధికారికంగా ప్రకటించారు. ఎకో క్లబ్ ఆధ్వర్యంలో ఈ కార్యక్రమం నిర్వహించారు. విద్యార్థులు, అధ్యాపకులు, సిబ్బంది రావి వృక్షం  పర్యావరణ, సాంస్కృతిక ప్రాముఖ్యతను వేడుకగా జరుపుకోవడానికి దాని చుట్టూ సమావేశమయ్యారు.కళాశాల ప్రిన్సిపాల్, ప్రొ. బి. లక్ష్మణ్ నాయక్, ఆ పురాతన వృక్షాన్ని సంస్థాగత మాతృ వృక్షంగా గుర్తించినట్లు లాంఛనంగా ప్రకటించారు. వారసత్వ వృక్షాలను పరిరక్షించడం యొక్క ప్రాముఖ్యతను నొక్కిచెప్పారు. అవి తరతరాలకు సజీవ సాక్షులుగా నిలుస్తాయని, నిరంతరత, స్థితిస్థాపకత,పర్యావరణ సమతుల్యతకు ప్రతీకగా నిలుస్తాయని పేర్కొన్నారు.ఎకో క్లబ్ కోఆర్డినేటర్ శ్రీ జె. అనిల్ కుమార్ మాట్లాడుతూ, పురాతన వృక్షాలను అమూల్యమైన సహజ వారసత్వంగా గుర్తించి, పరిరక్షించాలని విద్యార్థులను, సిబ్బందిని కోరారు. అనంతరం విద్యార్థులు, సిబ్బంది ఆ చెట్టు చుట్టూ వలయంలా ఏర్పడి, దానిని ఆత్మీయ  ఆలింగనం చేసుకుని, ప్రకృతితో శాంతి,అనుబంధ భావనను అనుభవించారు. కళాశాల ఆడిటోరియం సమీపంలో ఉన్న పవిత్రమైన రావి చెట్టును, ప్రిన్సిపాల్, అధ్యాపకులు,విద్యార్థుల సమిష్టి సమ్మతితో అధికారికంగా సంస్థాగత మాతృ వృక్షంగా ప్రకటించారు. ఈ సందర్భంగా పవిత్ర ప్రతిజ్ఞ చేశారు. కార్యక్రమంలో వైస్ ప్రిన్సిపాల్ డా. సిహెచ్ శ్రీనివాసులు, అధ్యాపకులు బి శ్రీనివాస్, డా.వి సాంబశివరావు, డా.బి హాతిరామ్, యం వీరు, డా.కే సుమలత, డా.పి ఉపేందర్, జే.యాకయ్య,విద్యార్థిని విద్యార్థులు పాల్గొన్నారు .