విశ్వంభర, రాజన్న సిరిసిల్ల జిల్లా: గంభీరావుపేట పోలీస్‌స్టేషన్ పరిధిలో నమోదైన రెండు చోరీ కేసులను పోలీసులు ఛేదించి నలుగురు నిందితులను అరెస్ట్ చేశారు. వారి వద్ద నుంచి చోరీకి ఉపయోగించిన ఆటోతో పాటు చోరీ చేసిన ఇనుప సామగ్రిని స్వాధీనం చేసుకున్నారు. పోలీసుల వివరాల ప్రకారం.. గంభీరావుపేట గ్రామ శివారులో వ్యవసాయ బోర్ల వద్ద అమర్చిన విద్యుత్ మోటార్ల కరెంట్ వైర్లు, లింగన్నపేట శివారులోని శ్రీ లక్ష్మీనారాయణ ఇండస్ట్రీస్ రైస్‌మిల్‌లో ఇనుప రాడ్లు, ఇతర ఇనుప సామగ్రి చోరీకి గురయ్యాయి. ఈ కేసుల దర్యాప్తులో భాగంగా విశ్వసనీయ సమాచారం మేరకు నర్మాల గ్రామ శివారులోని అగస్త్య ఫుడ్ కంపెనీ సమీపంలో అనుమానాస్పదంగా ఆటోలో తిరుగుతున్న నలుగురిని అదుపులోకి తీసుకుని విచారించగా, చోరీలకు పాల్పడినట్లు ఒప్పుకున్నారు. అరెస్టైన నిందితులు దుబ్బాకకు చెందిన నూనె నర్సింహులు (43), తుర్పతి సంజీవ్ అలియాస్ సంజీవ్ (26), నూనె శ్యామల (32), నూనె నాగమణి (39). వీరు పాత ఇనుప సామగ్రి, ప్లాస్టిక్ వస్తువులు సేకరించే పేరుతో గ్రామాల్లో సంచరిస్తూ వ్యవసాయ బావుల వద్ద విద్యుత్ వైర్లు, రైస్‌మిల్లుల్లోని ఇనుప సామగ్రిని చోరీ చేసి విక్రయించినట్లు పోలీసులు తెలిపారు. నిందితుల నుంచి చోరీకి ఉపయోగించిన TS15UB2248 నంబర్ ఆటోతో పాటు చోరీ సొత్తును స్వాధీనం చేసుకున్నారు. వీరికి ఇతర పోలీస్ స్టేషన్ల పరిధిలో నమోదైన పలు చోరీ కేసులతో కూడా సంబంధం ఉన్నట్లు దర్యాప్తులో వెల్లడైందని పోలీసులు తెలిపారు.