విశ్వంభర, నార్సింగ్ : హామ్‌స్టెక్ కాలేజ్ ఆఫ్ క్రియేటివ్ ఎడ్యుకేషన్ ఆదివారం హైదరాబాదు నగరంలోని నార్సింగ్ ప్రాంతంలో నిర్వహించిన హామ్‌స్టెక్ క్రియేటర్స్ కలెక్ట్–2026కు విశేష స్పందన లభించింది. 10 వేల మందికిపైగా సందర్శకులను ఆకర్షించిన ఈ కార్యక్రమంలో 900 మందికిపైగా పట్టభద్ర విద్యార్థులు ఫ్యాషన్ డిజైన్, ఇంటీరియర్ డిజైన్, గ్రాఫిక్ డిజైన్, ఫోటోగ్రఫీ, మేకప్ ఆర్టిస్ట్రీ, కులినరీ ఆర్ట్స్ విభాగాల్లో తమ సృజనాత్మక ప్రతిభను ప్రదర్శించారు. ఈ సందర్భంగా హామ్‌స్టెక్ కృత్రిమ మేధస్సు (ఏఐ) సమగ్ర పాఠ్యాంశాలను ప్రవేశపెడుతున్నట్లు ప్రకటించింది. అలాగే కొల్హాపూర్‌లోని సంజయ్ ఘోడావత్ విశ్వవిద్యాలయం, వరంగల్‌లోని ఎస్‌ఆర్ విశ్వవిద్యాలయంతో భాగస్వామ్యంగా రెండు కొత్త డిజైన్ పాఠశాలలను ప్రారంభించనున్నట్లు వెల్లడించింది. విద్యార్థులకు జీవితాంతం కెరీర్ సహాయం అందించే కార్యక్రమంతో పాటు, యువ పారిశ్రామికవేత్తలను ప్రోత్సహించేందుకు హామ్‌స్టెక్ లాంచ్‌ప్యాడ్ కార్యక్రమాన్ని ఆవిష్కరించింది. జాతీయ అవార్డు గ్రహీత ఫ్యాషన్ డిజైనర్ నీతా లుల్లా, ప్రముఖ ఫోటోగ్రాఫర్ అవినాష్ గోవారికర్‌తో పాటు వివిధ రంగాల నిపుణులు విద్యార్థుల ప్రదర్శనలను పరిశీలించి సూచనలు అందించారు. సినీ నటుడు విశ్వక్ సేన్ ముఖ్య అతిథిగా పాల్గొని విద్యార్థుల ప్రతిభను అభినందించారు. ఈ సందర్భంగా ఆయన నటిస్తున్న 'కల్ట్' చిత్రంలోని 'హీ ఈజ్ మై దోస్తీ' పాటను చిత్రబృందంతో కలిసి విడుదల చేశారు. ఈ కార్యక్రమంలో విద్యార్థులు, తల్లిదండ్రులు, పూర్వ విద్యార్థులు, పరిశ్రమల ప్రతినిధులు, నియామక సంస్థలు, సృజనాత్మక రంగాలకు చెందిన ప్రముఖులు పాల్గొన్నారు.