విశ్వంభర, యాదగిరిగుట్ట: వైకుంఠ ఏకాదశి సందర్భంగా తెలుగు రాష్ట్రాల్లోని శ్రీ లక్ష్మీనరసింహస్వామి, శ్రీ వెంకటేశ్వరస్వామి దేవాలయాలు భక్తులతో కిటకిటలాడాయి. తెల్లవారుజాము నుంచే వేలాదిమంది భక్తులు ఆలయాలకు చేరుకుని ప్రత్యేక పూజలు, అభిషేకాలు నిర్వహించి స్వామివారి దర్శనం చేసుకుని ఆశీస్సులు పొందారు. పురాణాల ప్రకారం వైకుంఠ ఏకాదశి అత్యంత పవిత్రమైన రోజుగా భావిస్తారు. ఈ రోజున శ్రీమహావిష్ణువును భక్తిశ్రద్ధలతో ఆరాధిస్తే సకల శుభాలు కలుగుతాయని, వైకుంఠ ద్వార దర్శనం లభిస్తుందని భక్తుల విశ్వాసం. ఈ సందర్భంగా దేవాలయాల్లో ప్రత్యేక అలంకరణలు, అర్చనలు, అభిషేకాలు, తీర్థప్రసాదాల పంపిణీ నిర్వహించారు. యాదగిరిగుట్టలోని శ్రీ లక్ష్మీనరసింహస్వామివారిని తెలుగుదేశం పార్టీ జాతీయ ప్రచార కార్యదర్శి జె. దశరథ్ వేకువజామున దర్శించుకుని ప్రత్యేక అభిషేక పూజల్లో పాల్గొన్నారు. అనంతరం ఆలయ అర్చకులు వేదమంత్రోచ్చారణల మధ్య ఆయనకు, కుటుంబ సభ్యులకు స్వామివారి తీర్థప్రసాదాలు, ఆశీర్వచనాలు అందజేశారు. వైకుంఠ ఏకాదశి సందర్భంగా యాదాద్రితో పాటు భద్రాచలం, బాసర, తిరుమల, ద్వారకా తిరుమల, వేములవాడ తదితర ప్రముఖ దేవాలయాల్లో కూడా భక్తులు భారీ సంఖ్యలో తరలివచ్చి స్వామివారిని దర్శించుకుని ప్రత్యేక పూజలు నిర్వహించారు. భక్తుల రద్దీ దృష్ట్యా ఆలయ అధికారులు విస్తృత ఏర్పాట్లు చేసి దర్శనాలను సజావుగా నిర్వహించారు.