19 ఏళ్ల తర్వాత కోల్కతాకు చేరుకున్న తస్లీమా నస్రీన్.
2007లో నిరసనల నేపథ్యంలో కోల్కతా విడిచి వెళ్లిన రచయిత్రి.
Taslima Nasrin: బంగ్లాదేశ్కు చెందిన ప్రముఖ ప్రవాస రచయిత్రి తస్లీమా నస్రీన్ సుమారు 19 ఏళ్ల తర్వాత శుక్రవారం కోల్కతా నగరంలో అడుగుపెట్టారు. 2007లో ఆమె రచనలపై తలెత్తిన తీవ్ర నిరసనలు, హింసాత్మక ఘటనల నేపథ్యంలో కోల్కతాను విడిచి వెళ్లాల్సి వచ్చిన తస్లీమా, దాదాపు రెండు దశాబ్దాల తర్వాత తిరిగి నగరానికి రావడం ప్రాధాన్యత సంతరించుకుంది. ఓ సాహిత్య కార్యక్రమంలో పాల్గొనేందుకు వచ్చిన ఆమెకు భారీ భద్రత కల్పించారు. మహిళా హక్కులు, భావ వ్యక్తీకరణ స్వేచ్ఛ, మతపరమైన అశాస్త్రీయ ధోరణులపై తన రచనల ద్వారా ప్రపంచవ్యాప్తంగా గుర్తింపు పొందిన తస్లీమా నస్రీన్ 1994 నుంచి ప్రవాస జీవితాన్ని గడుపుతున్నారు. కోల్కతా చేరుకున్న అనంతరం మాట్లాడిన ఆమె, ఈ నగరాన్ని ఎప్పుడూ తన సొంత ఇంటిగానే భావిస్తానని, ఎన్నో మధుర జ్ఞాపకాలు ఈ నగరంతో ముడిపడి ఉన్నాయని తెలిపారు. మాతృభూమికి చేరువైన ఈ క్షణం తనకు ఎంతో సంతోషాన్ని, భావోద్వేగాన్ని కలిగిస్తోందని ఆమె పేర్కొన్నారు.
Advertisement
