అడ్వ‌కేట్స్ కి ఆరోగ్య బీమా కల్పించండి

విశ్వంభర, హైదరాబాద్: తెలంగాణ రాష్ట్ర‌వ్యాప్తంగా జిల్లా కోర్టులు, హైకోర్టులో ప్రాక్టీస్ చేస్తున్న అడ్వ‌కేట్స్ అంద‌రికీ ఆరోగ్య బీమా పథకాన్ని క‌ల్పించాల‌ని, కొత్తగా ఎన్నికైన తెలంగాణ హైకోర్టు న్యాయవాదుల సంఘం తెలంగాణ రాష్ట్ర ప్రభుత్వానికి విజ్ఞప్తి చేసింది. 2019 తర్వాత చేరి, ప్రస్తుతం ఈ పథకం పరిధిలోకి రాని వారితో సహా, న్యాయవాదులందరికీ ఆరోగ్య బీమా ప్రయోజనాలను అందించాలని కోరుతూ సంఘం నాయకులు న్యాయ కార్యదర్శి పాపిరెడ్డికి ఒక వినతిపత్రాన్ని ఆదివారం సమర్పించారు. పేద‌లు, అన్యాయానికి గురైన ప‌క్షాల‌కు సేవ చేసే న్యాయ‌ వ్యవస్థలో న్యాయవాదులు కీలక పాత్ర పోషిస్తారని గుర్తు చేశారు. అటువంటి న్యాయ‌వాదుల‌కు ఆరోగ్య భద్రత విషయంలో ప్ర‌భుత్వం నుంచి ప్ర‌త్యేక చొర‌వ అవ‌స‌ర‌మ‌ని గుర్తించారు. ప్ర‌స్తుతం రాష్ట్రంలోని ప్రాక్టీసు చేస్తున్న‌ యువ న్యాయవాదులకు సంక్షేమ మద్దతు అవసరమని హైకోర్టు అడ్వ‌కేట్ అసోసియేష‌న్ బ‌లంగా అభిప్రాయ‌ప‌డింది. ప్రాక్టీస్ ప్రారంభ సంవత్సరాల్లో జూనియర్ న్యాయవాదులకు మద్దతుగా స్టైఫండ్ ప్రవేశపెట్టాలని అసోసియేష‌న్ ప్రభుత్వాన్ని కోరింది. దాంతోపాటు, తెలంగాణ హైకోర్టు అసోసియేష‌న్ కు రావలసిన పెండింగ్ గ్రాంట్లను వీలైనంత త్వరగా విడుదల చేయాలని అభ్య‌ర్థించారు. రాష్ట్ర ప్రభుత్వం సానుకూలంగా స్పందించి, న్యాయవాద వృత్తికి సంక్షేమ ఆధారిత నిర్ణయాలు తీసుకుంటుందని అడ్వ‌కేట్ అసోసియేష‌న్ నాయ‌కులు ఆశాభావం వ్యక్తం చేశారు. కాగా, ఈ వినతిపత్రాన్ని తెలంగాణ లా సెక్ర‌ట‌రీ పాపిరెడ్డికి అంద‌జేసిన వారిలో హైకోర్టు  అడ్వ‌కేట్స్‌ అసోసియేషన్ అధ్యక్షుడు ఎస్. సురేందర్ రెడ్డి, ఉపాధ్యక్షుడు డి.ఎల్. పాండు, కార్యదర్శులు పి. శ్రవణ్ కుమార్ గౌడ్, నిరంజన్ రెడ్డి త‌దిత‌రులు ఉన్నారు.