ప్రెస్ క్లబ్ భవనం కోసం తహసీల్దార్‌కు వినతి

విశ్వంభర, భద్రాచలం: భద్రాచలం పట్టణంలోని అన్ని ప్రెస్ క్లబ్‌లు, మీడియా సంస్థల ప్రతినిధులు ఒకే వేదికపై సమావేశమై జర్నలిస్టుల అభివృద్ధి, సమస్యల పరిష్కారం, వృత్తి పరమైన అవసరాలపై సమగ్రంగా చర్చించారు. ఈ సమావేశంలో ముఖ్యంగా జర్నలిస్టులందరికీ ఉమ్మడిగా ఉపయోగపడే విధంగా ఒక ప్రెస్ క్లబ్ భవనం, విశాలమైన మీటింగ్ హాల్, ప్రెస్ మీట్ల కోసం సదుపాయాలు, కార్యాలయ అవసరాల కోసం స్థిరమైన కేంద్రం ఉండాలని ఏకగ్రీవంగా తీర్మానించారు. ప్రస్తుతం జర్నలిస్టులు వివిధ ప్రాంతాల్లో చెల్లాచెదురుగా సమావేశాలు నిర్వహించాల్సి వస్తోందని, ఒకే వేదిక లేకపోవడం వల్ల సమన్వయం లోపిస్తోందని ఆవేదన వ్యక్తం చేశారు. అలాగే అత్యవసర సమావేశాలు, మీడియా బ్రీఫింగ్స్ నిర్వహించేందుకు సరైన సౌకర్యాలు లేకపోవడం వృత్తి నిర్వహణపై ప్రభావం చూపుతోందని పేర్కొన్నారు. జర్నలిస్టుల ఐక్యతతో మాత్రమే ఈ సమస్యలకు పరిష్కారం లభిస్తుందని భావించి అన్ని ప్రెస్ క్లబ్‌లు ఏకమై ముందుకు రావడం విశేషమని సీనియర్ జర్నలిస్టులు అభిప్రాయపడ్డారు. ఈ సందర్భంగా స్థానిక తహసీల్దార్ ధనియాల వెంకటేశ్వర్లును కలిసి వినతిపత్రం సమర్పిస్తూ పట్టణంలో ప్రభుత్వానికి చెందిన ఖాళీ స్థలాన్ని గుర్తించి ప్రెస్ క్లబ్ నిర్మాణానికి కేటాయించాలని విజ్ఞప్తి చేశారు. ఈ కార్యక్రమంలో పట్టణంలోని పలు వార్తాపత్రికలు, టెలివిజన్ ఛానల్‌లు, ఆన్‌లైన్ మీడియా ప్రతినిధులు, ప్రెస్ క్లబ్ సభ్యులు, యువ జర్నలిస్టులు పెద్ద సంఖ్యలో పాల్గొన్నారు.