కుటుంబ కౌన్సెలింగ్ వ్యవస్థను మెరుగుపరచాలి 

 విశ్వంభర, జిహెచ్ఎంసి : తెలంగాణ జైళ్ళు శిక్షణా సేవల శాఖ ఆధ్వర్యంలో రిట్రీట్–2026 ముగింపు సమావేశం  చంచల్‌గూడలోని సికా లో నిర్వహించారు.ఈ కార్యక్రమానికి హోం శాఖ ప్రత్యేక ప్రధాన కార్యదర్శి  సి.వి. ఆనంద్  గౌరవ ముఖ్య అతిథిగా పాల్గొన్నారు. గౌరవ ముఖ్య అతిథిని జైళ్ళు శిక్షణా సేవల డైరెక్టర్ జనరల్  సౌమ్య మిశ్రా ఆహ్వానించి, స్వాగతం పలుకుతూ స్వాగత ప్రసంగం చేశారు.ఈ కార్యక్రమంలో వివిధ జైళ్ళ సూపరింటెండెంట్లు జైలు పరిపాలనలో ముఖ్య అంశాలైన భద్రత పునరావాసం, మత్తు వ్యసన నివారణ, ఖైదీల సంక్షేమం వంటి విషయాలపై సంక్షిప్త ప్రదర్శనలు ఇచ్చారు. ఈ ప్రదర్శనలు శాఖ చేపడుతున్న సంస్కరణాత్మక చర్యలను ప్రతిబింబించాయి. సభను ఉద్దేశించి ముఖ్య అతిథి  సి.వి. ఆనంద్ తన విశాలమైన పరిపాలనా ,  పోలీసింగ్ అనుభవాన్ని పంచుకున్నారు.  హైదరాబాద్ నగర పోలీస్ కమిషనర్‌గా పనిచేసిన సమయంలో 175 ఏళ్ల చరిత్రలో మొదటిసారి మహిళా స్టేషన్ హౌస్ ఆఫీసర్‌ను నియమించిన విషయాన్ని కూడా గుర్తుచేశారు. ముఖ్యంగా జైళ్ళలో ఏర్పాటు చేసిన డీ-అడిక్షన్ కేంద్రాలను అభినందించారు. ఈ సౌకర్యాలను అన్ని జిల్లా జైళ్ళకు విస్తరించాలని సూచించారు. అదేవిధంగా డ్రోన్లు వంటి ఆధునిక సాంకేతికతతో భద్రతను బలోపేతం చేయడం, కుటుంబ కౌన్సెలింగ్ వ్యవస్థలను మెరుగుపరచడం, అన్ని జైళ్ళలో వీడియో కాన్ఫరెన్సింగ్ సదుపాయాలను పెంచడం అవసరమని సూచించారు. “క్యూర్, ప్యూర్, అండ్ రేర్” సిద్ధాంతాలను అనుసరించి పర్యావరణానికి అనుకూలమైన, కార్బన్ న్యూట్రల్ జైలు వాతావరణాలను అభివృద్ధి చేయాల్సిన అవసరాన్ని కూడా ఆయన ప్రాముఖ్యతతో వివరించారు. తన ముగింపు ప్రసంగంలో డీజీ జైళ్ళు  సౌమ్య మిశ్రా గౌరవ ముఖ్య అతిథికి విలువైన సూచనలు, మార్గదర్శకత్వం అందించినందుకు కృతజ్ఞతలు తెలిపారు. ఈ  కార్యక్రమంలో పాల్గొన్న అన్ని అధికారులను అభినందిస్తూ, సురక్షితమైన, మానవతా దృక్పథంతో కూడిన సంస్కరణాత్మక జైలు వ్యవస్థ నిర్మాణానికి శాఖ కట్టుబడి ఉందని తెలిపారు.ఈ ముగింపు సమావేశంతో రిట్రీట్–2026 విజయవంతంగా ముగిసింది జైళ్ళను సంస్కరణ, పునరావాసం మరియు సమాజంలో పునఃప్రవేశం కేంద్రాలుగా మార్చే శాఖ లక్ష్యాన్ని ఇది మరింత బలపరిచింది. ఈ కార్యక్రమంలో జైళ్ళ శాఖకు చెందిన సీనియర్ అధికారులు ఎన్. మురళి బాబు, ఇన్‌స్పెక్టర్ జనరల్ ఆఫ్ ప్రిజన్స్, డా. డి. శ్రీనివాస్, డిప్యూటీ ఇన్‌స్పెక్టర్ జనరల్ ఆఫ్ ప్రిజన్స్ (హైదరాబాద్ రేంజ్), మరియు  ఎం. సంపత్, డిప్యూటీ ఇన్‌స్పెక్టర్ జనరల్ ఆఫ్ ప్రిజన్స్ (వరంగల్ రేంజ్) పాల్గొన్నారు.