Taslima Nasrin: బంగ్లాదేశ్‌కు చెందిన ప్రముఖ ప్రవాస రచయిత్రి తస్లీమా నస్రీన్ మరోసారి తన అభిప్రాయాలతో చర్చనీయాంశంగా మారారు. మదర్సాలను రద్దు చేసి వాటిని లౌకిక విద్యను అందించే సాధారణ పాఠశాలలుగా మార్చాలని ఆమె అభిప్రాయపడ్డారు. విద్యా వ్యవస్థ మతానికి అతీతంగా ఉండాలని, పిల్లలందరికీ ఒకే విధమైన ఆధునిక, శాస్త్రీయ విద్య అందించాల్సిన అవసరం ఉందని పేర్కొన్నారు.

అలాగే దక్షిణాసియా దేశాలన్నింటిలో యూనిఫామ్ సివిల్ కోడ్ (UCC) అమలు చేయాలని తస్లీమా నస్రీన్ సూచించారు. మహిళలకు సమాన హక్కులు, న్యాయం, రక్షణ కల్పించడంలో యూనిఫామ్ సివిల్ కోడ్ కీలక పాత్ర పోషిస్తుందని ఆమె అభిప్రాయపడ్డారు. వ్యక్తిగత చట్టాల్లో సంస్కరణలు అవసరమని, లింగ సమానత్వం కోసం ఒకే విధమైన పౌర చట్టం అవసరమని పేర్కొన్నారు.

బంగ్లాదేశ్ రాజకీయాలపై కూడా ఆమె స్పందించారు. అవామీ లీగ్ పార్టీపై విధించిన నిషేధాన్ని ఎత్తివేయాలని, ఆ పార్టీ నాయకులు, కార్యకర్తలు తిరిగి దేశంలోకి వచ్చి రాజకీయ కార్యకలాపాలు నిర్వహించే అవకాశం కల్పించాలని డిమాండ్ చేశారు. ప్రజాస్వామ్య విలువలను పరిరక్షించాలంటే అన్ని రాజకీయ పార్టీలకు సమాన అవకాశాలు ఉండాలని ఆమె అన్నారు.

తస్లీమా నస్రీన్ చేసిన ఈ వ్యాఖ్యలు దక్షిణాసియా రాజకీయ, సామాజిక వర్గాల్లో చర్చకు దారితీశాయి. మహిళల హక్కులు, విద్యా వ్యవస్థ, ప్రజాస్వామ్యం వంటి అంశాలపై ఆమె చేసిన వ్యాఖ్యలు సోషల్ మీడియాలో వైరల్ అవుతున్నాయి.