Baby Powder: జాన్సన్ & జాన్సన్ (Johnson & Johnson) తమ టాల్క్ (Talc) ఆధారిత బేబీ పౌడర్, ఇతర ఉత్పత్తుల వల్ల అండాశయ క్యాన్సర్ వచ్చిందని ఆరోపిస్తూ దాఖలైన వేలాది కేసులను పరిష్కరించేందుకు 5.5 బిలియన్ డాలర్ల సెటిల్‌మెంట్ ప్రతిపాదించింది. ఈ ఒప్పందం అమలైతే అమెరికా వ్యాప్తంగా పెండింగ్‌లో ఉన్న సుమారు 76 వేల కేసులకు పరిష్కారం లభించే అవకాశం ఉంది.

అయితే ఈ సెటిల్‌మెంట్ అమల్లోకి రావాలంటే కేసులు దాఖలు చేసిన వారిలో కనీసం 95 శాతం మంది దీనికి అంగీకరించాల్సి ఉంటుంది. కంపెనీ 2027 నాటికి 3 బిలియన్ డాలర్లు, మిగిలిన మొత్తాన్ని 2028లో చెల్లించాలని ప్రతిపాదించింది. కేసుల సంఖ్య, అంగీకారాల ఆధారంగా ఈ మొత్తం మరింత పెరిగే అవకాశం ఉందని న్యాయవాదులు పేర్కొంటున్నారు.

ఇదిలా ఉండగా, తమ టాల్క్ ఉత్పత్తుల వల్ల క్యాన్సర్ వస్తుందనే ఆరోపణలను జాన్సన్ & జాన్సన్ మరోసారి ఖండించింది. తమ బేబీ పౌడర్‌లో హానికరమైన ఆస్బెస్టాస్ లేదని, ఉత్పత్తులు సురక్షితమేనని కంపెనీ స్పష్టం చేసింది. దశాబ్ద కాలంగా కొనసాగుతున్న న్యాయ వివాదాలు, కోర్టు ఖర్చులకు ముగింపు పలికేందుకే ఈ సెటిల్‌మెంట్‌కు సిద్ధమైనట్లు వెల్లడించింది. 2020లోనే అమెరికాలో టాల్క్ ఆధారిత బేబీ పౌడర్ విక్రయాలను నిలిపివేసి, కార్న్‌స్టార్చ్ ఆధారిత పౌడర్‌ను మార్కెట్లోకి తీసుకొచ్చిన విషయం తెలిసిందే.