Hyderabad KBR Park:

హైదరాబాద్‌లోని బంజారాహిల్స్‌లో ఉన్న కాసు బ్రహ్మానందరెడ్డి (కేబీఆర్) నేషనల్ పార్క్‌లో శనివారం ఉదయం భారీ కొండచిలువ కనిపించడం వాకర్లలో కలకలం రేపింది. ఉదయం నిత్యం వాకింగ్‌కు వచ్చే వారు పార్క్‌లో సంచరిస్తుండగా, సుమారు 20 అడుగుల పొడవున్న కొండచిలువ ఒక్కసారిగా వాకింగ్ ట్రాక్‌పైకి వచ్చింది. ట్రాక్‌ను నెమ్మదిగా దాటుతూ అడవివైపు వెళ్లడంతో అక్కడున్న వారంతా ఒక్కసారిగా ఆశ్చర్యానికి గురయ్యారు. కొందరు దూరం నుంచే వీడియోలు, ఫొటోలు తీసి సోషల్ మీడియాలో పోస్ట్ చేయడంతో అవి వైరల్‌గా మారాయి. కొండచిలువ ఎవరిపైనా దాడి చేయకుండా తన దారిన తాను వెళ్లిపోవడంతో అందరూ ఊపిరి పీల్చుకున్నారు.

కేబీఆర్ నేషనల్ పార్క్ నగరం నడిబొడ్డున ఉన్నప్పటికీ సమృద్ధిగా చెట్లు, పొదలు, సహజ అడవి వాతావరణం ఉండటంతో అనేక రకాల వన్యప్రాణులు, పక్షులు, సరీసృపాలకు ఇది ఆవాసంగా ఉంది. వర్షాకాలంలో లేదా వాతావరణ మార్పుల సమయంలో ఇలాంటి సరీసృపాలు బయటకు రావడం అసాధారణం కాదని అటవీ శాఖ వర్గాలు చెబుతున్నాయి. అయితే ఇలాంటి సందర్భాల్లో భయాందోళనలకు గురికాకుండా, వాటికి దూరంగా ఉండాలని, వీడియోలు తీసేందుకు దగ్గరకు వెళ్లకుండా వెంటనే అటవీ శాఖ లేదా పార్కు అధికారులకు సమాచారం ఇవ్వాలని సూచిస్తున్నారు. వన్యప్రాణుల సంరక్షణతో పాటు సందర్శకుల భద్రత కూడా అంతే ముఖ్యమని అధికారులు పేర్కొంటున్నారు.