Ranga reddy:  రంగారెడ్డి జిల్లా శంషాబాద్ మండలం బహదూర్‌గూడ గ్రామంలో భూవివాదం ఉద్రిక్తతకు దారితీసింది. రైతులకు చెందినట్లు చెబుతున్న సుమారు 650 ఎకరాల భూమి చుట్టూ హైడ్రా అధికారులు ఫెన్సింగ్ ఏర్పాటు చేయడంతో రైతులు తీవ్ర ఆందోళనకు దిగారు. భూములను కాపాడాలని డిమాండ్ చేస్తూ గ్రామంలోనే దీక్షా శిబిరం ఏర్పాటు చేసి నిరసన కొనసాగిస్తున్నారు. అయితే రాత్రికి రాత్రే భారీ సంఖ్యలో పోలీసులు గ్రామానికి చేరుకుని దీక్షలో ఉన్న రైతులను అక్కడి నుంచి ఇతర ప్రాంతాలకు తరలించారు. అనంతరం దీక్ష కోసం ఏర్పాటు చేసిన టెంట్లు, ఇతర సామగ్రిని తొలగించారు.

ఈ ఘటన తర్వాత బహదూర్‌గూడ గ్రామంలో భారీ పోలీసు బందోబస్తు ఏర్పాటు చేశారు. గ్రామంలోకి బయటి వ్యక్తులు, రాజకీయ పార్టీల నాయకులు, ప్రజాసంఘాల ప్రతినిధులు ప్రవేశించకుండా అన్ని ప్రధాన రహదారుల వద్ద పోలీసులు గస్తీ నిర్వహిస్తున్నారు. గ్రామంలో ఎలాంటి అవాంఛనీయ ఘటనలు జరగకుండా నిరంతరం పహారా కాస్తున్నారు. తమ భూములను కాపాడుకునేందుకే ఉద్యమం చేస్తున్నామని రైతులు ఆవేదన వ్యక్తం చేస్తుండగా, పరిస్థితి ఉద్రిక్తంగా మారడంతో అధికారులు అప్రమత్తంగా వ్యవహరిస్తున్నారు. ఈ వ్యవహారంపై రైతులు, అధికారులు తమ తమ వాదనలు వినిపిస్తుండగా, బహదూర్‌గూడలో పరిస్థితి ఉద్రిక్తంగానే కొనసాగుతోంది.