విశ్వంభర,సూర్యాపేట:  వర్షపు నీటి సంరక్షణ ద్వారా భూగర్భ జలాలను పరిరక్షించడంతో పాటు భావితరాలకు నీటి భద్రత కల్పించవచ్చని సూర్యాపేట మున్సిపల్ చైర్‌పర్సన్ మొరిశెట్టి నివేదిత లక్షాది అన్నారు. నీటి సంరక్షణపై చిన్నారుల్లో అవగాహన పెంపొందించడమే లక్ష్యంగా నిర్వహిస్తున్న కార్యక్రమాలు సమాజంలో సానుకూల మార్పునకు దోహదపడతాయని పేర్కొన్నారు. రాష్ట్ర ప్రభుత్వం చేపట్టిన "క్యాచ్ ది రైన్ – సేవ్ వాటర్" అవగాహన కార్యక్రమంలో భాగంగా శనివారం సూర్యాపేటలోని జీఆర్ వివేకావాణి పాఠశాలలో వర్షపు నీటి సంరక్షణపై విద్యార్థులకు అవగాహన కల్పించేందుకు చిత్రలేఖన (డ్రాయింగ్), ఉపన్యాస పోటీలు నిర్వహించారు. ఈ కార్యక్రమానికి మున్సిపల్ చైర్‌పర్సన్ మొరిశెట్టి నివేదిత లక్షాది, మున్సిపల్ కమిషనర్ సి.హెచ్. హనుమంత రెడ్డి ముఖ్య అతిథులుగా హాజరయ్యారు.ఈ సందర్భంగా మొరిశెట్టి నివేదిత లక్షాది మాట్లాడుతూ, వర్షాకాలంలో కురిసే ప్రతి చుక్క నీటిని సద్వినియోగం చేసుకోవడం నేటి అవసరమని అన్నారు. ప్రతి ఇంటి వద్ద, విద్యాసంస్థల్లో, ప్రభుత్వ, ప్రైవేటు కార్యాలయాల్లో వర్షపు నీటి ఇంకుడు గుంతలు (రైన్‌వాటర్ హార్వెస్టింగ్ పిట్స్) ఏర్పాటు చేయడం ద్వారా భూగర్భ జలాలను పునరుద్ధరించవచ్చని తెలిపారు. నీటి సంరక్షణపై విద్యార్థుల్లో చైతన్యం పెంపొందితే ఆ అవగాహన కుటుంబాలకు, సమాజానికి విస్తరిస్తుందని పేర్కొన్నారు.మున్సిపల్ కమిషనర్ సి.హెచ్. హనుమంత రెడ్డి మాట్లాడుతూ, వర్షపు నీటిని ఒడిసిపట్టడం ద్వారా భవిష్యత్తులో నీటి కొరతను గణనీయంగా తగ్గించవచ్చన్నారు. ప్రతి పౌరుడు నీటి సంరక్షణను సామాజిక బాధ్యతగా భావించి రైన్‌వాటర్ హార్వెస్టింగ్ వ్యవస్థలను ఏర్పాటు చేసుకోవాలని సూచించారు.అనంతరం నిర్వహించిన డ్రాయింగ్, ఉపన్యాస పోటీల్లో ప్రతిభ కనబరిచిన విద్యార్థులకు బహుమతులు అందజేసి అభినందించారు.పోటీల్లో పాల్గొన్న విద్యార్థులందరినీ ప్రోత్సహిస్తూ ప్రశంసించారు.ఈ కార్యక్రమంలో పాఠశాల కరస్పాండెంట్ గుడిమళ్ల సంతోష్ శర్మ, ప్రిన్సిపాల్ స్వప్న, కాంగ్రెస్ పార్టీ ఫ్లోర్ లీడర్, 47వ వార్డు కౌన్సిలర్ కుమ్మరికుంట్ల వేణు, 33వ వార్డు కౌన్సిలర్ శ్రీనివాస్, పర్యావరణ ఇంజనీర్ శివప్రసాద్, బిల్డింగ్ ఇన్‌స్పెక్టర్ అఖిల్, వార్డు అధికారి రాజేశ్వరి, ఉపాధ్యాయులు, విద్యార్థులు పాల్గొన్నారు. కార్యక్రమం ముగింపులో "ప్రతి చుక్కా అమూల్యమైనదే... వర్షపు నీటిని ఒడిసిపట్టి భవిష్యత్తును భద్రపరుచుకుందాం" అనే సందేశాన్ని విద్యార్థులకు అందించారు.