దసరా మామూళ్ల పేరుతో బలవంతపు వసూళ్లకు పాల్పడితే చర్యలు: త్రీటౌన్ సీఐ

Anantapuram news: అనంతపురం త్రీటౌన్ పోలీస్ స్టేషన్ పరిధిలో దసరా పండుగ నేపథ్యంలో వ్యాపారులు, దుకాణదారులతో పోలీసులు ప్రత్యేక సమావేశం నిర్వహించారు. విజయదశమి పండుగను పురస్కరించుకుని నిర్వహించిన ఈ సమావేశంలో త్రీటౌన్ సీఐ కౌలుట్లయ్య, ఎస్సైలు, పోలీసు సిబ్బంది పాల్గొన్నారు. స్థానికంగా ఉన్న హోటళ్లు, కిరాణా దుకాణాలు, మెడికల్ షాపులు, జనరల్ స్టోర్స్ నిర్వాహకులు సమావేశానికి హాజరయ్యారు.

ఈ సందర్భంగా సీఐ కౌలుట్లయ్య మాట్లాడుతూ.. దసరా పండుగ పేరుతో ట్రాన్స్‌జెండర్ వ్యక్తులు ఎవరైనా దుకాణాల వద్దకు వచ్చి బలవంతంగా డబ్బులు డిమాండ్ చేస్తే వెంటనే పోలీసులకు సమాచారం ఇవ్వాలని సూచించారు. వ్యాపారులను ఇబ్బందులకు గురిచేసే వారిపై చట్టప్రకారం చర్యలు తీసుకుంటామని హెచ్చరించారు.

ఎవరైనా బెదిరింపులకు లేదా బలవంతపు వసూళ్లకు పాల్పడితే వ్యాపారులు భయపడాల్సిన అవసరం లేదని సీఐ తెలిపారు. సమాచారం అందిన వెంటనే పోలీసులు స్పందిస్తారని చెప్పారు. పండుగ సమయంలో వ్యాపార ప్రాంతాల్లో శాంతిభద్రతలకు విఘాతం కలగకుండా ప్రతి ఒక్కరూ పోలీసులకు సహకరించాలని కోరారు.

అలాగే భద్రతా చర్యల్లో భాగంగా హోటల్ యజమానులు తమ ప్రాంగణాల్లో సీసీ కెమెరాలను తప్పనిసరిగా ఏర్పాటు చేసుకోవాలని సూచించారు. ఏర్పాటు చేసిన కెమెరాలు నిరంతరం పనిచేసేలా చూసుకోవాలని, ఏదైనా ఘటన చోటుచేసుకుంటే పోలీసుల దర్యాప్తునకు అవసరమైన సమాచారాన్ని అందుబాటులో ఉంచాలని తెలిపారు.

దసరా పండుగ సందర్భంగా వ్యాపారులు, దుకాణదారుల భద్రతకు అవసరమైన చర్యలు తీసుకుంటామని పోలీసులు తెలిపారు. నేరాల నియంత్రణ, శాంతిభద్రతల పరిరక్షణలో పోలీసు శాఖకు వ్యాపారులు సహకరించాలని త్రీటౌన్ సీఐ కౌలుట్లయ్య కోరారు.