భద్రాచల రాముడిని  దర్శించుకున్న అణుశక్తి విభాగ కార్యదర్శి

విశ్వంభర, భద్రాచలం: భారతదేశ అణుశక్తి రంగంలో కీలక బాధ్యతలు నిర్వహిస్తున్న ప్రముఖ అణుశాస్త్రవేత్త, భారత ప్రభుత్వ అణుశక్తి విభాగం కార్యదర్శి,  అణుశక్తి కమిషన్ చైర్మన్ డాక్టర్ అజిత్ కుమార్ మొహంతీ భద్రాచలంలోని శ్రీ సీతారామచంద్రస్వామి వారిని శ్రద్ధాభక్తులతో దర్శించుకున్నారు. దేశ శాస్త్రీయ అభివృద్ధికి దిశానిర్దేశం చేస్తున్న ప్రముఖుడు భద్రాచల రామయ్యను దర్శించడం ఆలయ క్షేత్రానికి ప్రత్యేక ప్రాధాన్యతను తీసుకువచ్చింది. ఆలయానికి విచ్చేసిన డాక్టర్ అజిత్ కుమార్ మొహంతీకి ఆలయ అర్చకులు  పూర్ణకుంభ స్వాగతం పలికారు. అనంతరం వేద మంత్రోచ్ఛరణలు, మంగళ వాయిద్యాల మధ్య స్వామివారి దర్శనం కల్పించారు. ఈ సందర్భంగా దేశ శాంతి, ప్రజల సంక్షేమం, శాస్త్ర సాంకేతిక రంగ పురోగతి, యువతకు మెరుగైన భవిష్యత్తు కలగాలని ప్రార్థనలు చేసినట్లు తెలిపారు. దర్శనానంతరం ఆలయ అర్చకులు స్వామివారి తీర్థ ప్రసాదాలు, శేషవస్త్రాన్ని అందజేశారు. ఆలయ అధికారులు భద్రాచల శ్రీరామాలయ చారిత్రక విశిష్టత, భక్త రామదాసు సేవలు, ఆలయ పరంపరలను వివరించారు. భద్రాచల క్షేత్రం భారతీయ సంస్కృతి, భక్తి సంప్రదాయాలకు నిలువెత్తు నిదర్శనమని డాక్టర్ అజిత్ కుమార్ మొహంతీ పేర్కొన్నారు. దేశవ్యాప్తంగా అణుశక్తి రంగానికి నాయకత్వం వహిస్తున్న ప్రముఖ శాస్త్రవేత్త స్వామివారి దర్శనం చేయడం భక్తుల్లో విశేష ఉత్సాహాన్ని కలిగించిందని ఆలయ అధికారులు తెలిపారు. ఈ కార్యక్రమంలో ఆలయ ఈవో, ఆలయ అర్చకులు, ఆలయ సిబ్బంది, అధికారులు, భక్తులు పాల్గొన్నారు.