Vizag International Airport: ఆంధ్రప్రదేశ్‌కు మరో కీలక మౌలిక వసతి ప్రాజెక్టు అందుబాటులోకి రానుంది. విశాఖపట్నంలో నిర్మించిన అల్లూరి సీతారామరాజు అంతర్జాతీయ విమానాశ్రయాన్ని నేడు ప్రధానమంత్రి నరేంద్ర మోదీ ప్రారంభించనున్నారు. కేంద్ర, రాష్ట్ర ప్రభుత్వాలు అధికారికంగా ఈ కార్యక్రమాన్ని ప్రకటించాయి. ఉత్తరాంధ్ర అభివృద్ధికి కొత్త ఊపునిచ్చే ఈ విమానాశ్రయం ప్రాంతీయ, జాతీయ, అంతర్జాతీయ అనుసంధానాన్ని మరింత బలోపేతం చేయనుందని అధికారులు పేర్కొంటున్నారు.

అత్యాధునిక సాంకేతిక పరిజ్ఞానంతో నిర్మించిన ఈ విమానాశ్రయం తొలి దశలో ఏటా 60 లక్షల మంది ప్రయాణికులను నిర్వహించే సామర్థ్యంతో అందుబాటులోకి వస్తోంది. భవిష్యత్తులో దీనిని 4 కోట్ల మంది ప్రయాణికులను నిర్వహించే స్థాయికి విస్తరించేలా ప్రణాళిక రూపొందించారు. విమానాశ్రయంలో 3,800 మీటర్ల పొడవైన కోడ్-4E రన్‌వే, సంవత్సరానికి 25,000 మెట్రిక్ టన్నుల కార్గో సామర్థ్యం, డిజియాత్ర ఆధారిత స్మార్ట్, కాంటాక్ట్‌లెస్ ప్రయాణికుల సేవలు, అత్యాధునిక టెర్మినల్ సౌకర్యాలు ఏర్పాటు చేశారు.

పర్యావరణ పరిరక్షణకు ప్రాధాన్యం ఇస్తూ 5 మెగావాట్ల సోలార్ పవర్ ప్లాంట్, 100 శాతం నీటి రీసైక్లింగ్ వ్యవస్థను కూడా ఈ ప్రాజెక్టులో ఏర్పాటు చేశారు. ఈ విమానాశ్రయం ద్వారా ప్రత్యక్షంగా, పరోక్షంగా సుమారు 1.8 లక్షల ఉద్యోగ అవకాశాలు లభిస్తాయని అధికారులు అంచనా వేస్తున్నారు. అలాగే ప్రతి ఏడాది 10 వేల మంది యువతకు నైపుణ్యాభివృద్ధి శిక్షణ అందించే అవకాశాలు కూడా ఈ ప్రాజెక్టుతో ఏర్పడనున్నాయి.

పర్యాటకం, ఐటీ, పరిశ్రమలు, ఎగుమతులు, వాణిజ్య రంగాలకు ఈ అంతర్జాతీయ విమానాశ్రయం కీలకంగా మారనుందని ప్రభుత్వం భావిస్తోంది. ముఖ్యంగా ఉత్తరాంధ్ర ప్రజలకు మెరుగైన వైమానిక అనుసంధానం కల్పించడంతో పాటు విదేశీ పెట్టుబడులను ఆకర్షించడంలో ఈ ప్రాజెక్టు కీలక పాత్ర పోషిస్తుందని అధికారులు పేర్కొంటున్నారు.