ట్రల్లిస్ స్కూల్‌లో విచారణ మొదలు.. రంగంలోకి చైల్డ్ వెల్ఫేర్ కమిషన్

Trallis School Anantapur: అనంతపురం అర్బన్‌లోని ట్రల్లిస్ స్కూల్‌లో వివాదానికి సంబంధించి అధికారులు, చైల్డ్ వెల్ఫేర్ కమిషన్ ప్రతినిధుల విచారణ ప్రారంభమైంది. మైనర్ బాలికపై దాడి జరిగినట్లు తల్లిదండ్రులు చేసిన ఫిర్యాదుల నేపథ్యంలో ఈ విచారణ చేపట్టినట్లు సమాచారం.

ట్రల్లిస్ స్కూల్‌లో జరిగిన ఘటనపై బాలిక తల్లిదండ్రులు తమ ఆవేదనను గతంలో రాప్తాడులో నిర్వహించిన కార్యక్రమంలో విద్యాశాఖ మంత్రి నారా లోకేష్‌ను కలిసి వివరించినట్లు తెలిపారు. తమ కుమార్తెకు జరిగిన ఘటనపై చర్యలు తీసుకోవాలని వారు మంత్రికి విజ్ఞప్తి చేసినట్లు పేర్కొన్నారు.

ఈ నేపథ్యంలో చైల్డ్ వెల్ఫేర్ సంబంధిత అధికారులు, సంఘాల ప్రతినిధులు నేడు ట్రల్లిస్ స్కూల్‌కు చేరుకుని విచారణ ప్రారంభించారు. ఘటనకు సంబంధించిన వివరాలు, పాఠశాల యాజమాన్యం వ్యవహరించిన తీరు, బాలిక భద్రతకు తీసుకున్న చర్యలు తదితర అంశాలపై అధికారులు వివరాలు సేకరిస్తున్నట్లు సమాచారం.

బాలికకు సంబంధించిన వ్యక్తిగత వివరాలు వెల్లడించకుండా అధికారులు విచారణ కొనసాగిస్తున్నారు. ఘటనపై పూర్తి వివరాలు, సంబంధిత వ్యక్తుల వాంగ్మూలాలు, పాఠశాల రికార్డులను పరిశీలించిన తర్వాతే తదుపరి చర్యలపై స్పష్టత వచ్చే అవకాశం ఉంది.

మరోవైపు, బాలిక తల్లిదండ్రులు తమకు న్యాయం చేయాలని కోరుతున్నారు. విచారణ పూర్తయిన అనంతరం అధికారులు వెల్లడించే వివరాలు, తీసుకునే చర్యలపై ఉత్కంఠ నెలకొంది.