Chittoor News: చిత్తూరు జిల్లాలోని ఐరాల మండలం ఎర్రిపల్లి పంచాయతీ పరిధిలోని కంపల్లె గ్రామంలో దివ్యాంగుల జేఏసీ ఉమ్మడి చిత్తూరు జిల్లా మహిళా అధ్యక్షురాలు సుమతిపై జరిగిన దాడి ఘటన ఆలస్యంగా వెలుగులోకి వచ్చింది. 48 సెంట్ల స్థల వివాదం నేపథ్యంలో రాజేంద్ర రెడ్డి దాడి చేసినట్లు ఆరోపణలు ఉన్నాయి. ఈ నెల 8న జరిగిన ఈ ఘటనకు సంబంధించి బయటకు వచ్చిన దృశ్యాలు ప్రస్తుతం తీవ్ర చర్చకు దారితీశాయి. మరో దివ్యాంగురాలు విజయకు జరుగుతున్న అన్యాయంపై మద్దతుగా జేఏసీ ప్రతినిధులు గ్రామానికి వెళ్లిన సమయంలో ఈ ఘటన జరిగినట్లు బాధితులు చెబుతున్నారు.

బాధితుల కథనం ప్రకారం, స్థల వివాదం ఉద్రిక్తంగా మారే అవకాశం ఉందని ముందుగానే తహశీల్దార్‌ను కలిసి పోలీసు బందోబస్తు కల్పించాలని కోరినా స్పందన రాలేదని ఆరోపిస్తున్నారు. అనంతరం దివ్యాంగురాలైన సుమతిపై విచక్షణారహితంగా దాడి జరిగిందని, ఈ ఘటనపై ఐరాల పోలీస్ స్టేషన్‌లో ఫిర్యాదు చేసినట్లు తెలిపారు. అయితే ఆ తర్వాత రాజేంద్ర రెడ్డి ఇచ్చిన ఫిర్యాదు ఆధారంగా ఈ నెల 11న ఎనిమిది మంది దివ్యాంగ బాధితులపైనే పోలీసులు కేసులు నమోదు చేశారని వారు ఆరోపిస్తున్నారు.

ఈ వ్యవహారం ఇప్పుడు రాజకీయంగానూ చర్చనీయాంశంగా మారింది. సీఎం నారా చంద్రబాబు సొంత జిల్లాలోనే దివ్యాంగులకు రక్షణ లేకుండా పోయిందని బాధితులు ఆరోపిస్తున్నారు. దాడికి పాల్పడిన వారిపై కఠిన చర్యలు తీసుకోవడంతో పాటు, బాధితులపై నమోదైన ఎదురుకేసులను ఉపసంహరించుకుని నిష్పక్షపాత విచారణ జరపాలని దివ్యాంగ సంఘాలు డిమాండ్ చేస్తున్నాయి. అయితే ఈ ఆరోపణలపై పోలీసుల నుంచి పూర్తి స్థాయి అధికారిక వివరణ రావాల్సి ఉంది.