కేఎఫ్‌సీ ప్రియులకు షాకింగ్.. చికెన్‌లో పురుగు...ఎక్క‌డ అంటే?

KFC Chicken: కేఎఫ్‌సీ చికెన్ ప్రియులకు షాకింగ్ ఘటన వెలుగులోకి వచ్చింది. ఉత్తరప్రదేశ్‌లోని గ్రేటర్ నోయిడా గౌర్ సిటీ మాల్‌లో ఉన్న కేఎఫ్‌సీ ఔట్‌లెట్‌లో ఓ కస్టమర్‌కు చేదు అనుభవం ఎదురైనట్లు తెలుస్తోంది. ఎంతో ఇష్టంగా ఆర్డర్ చేసిన డీప్ ఫ్రైడ్ చికెన్‌లో పురుగు కనిపించిందని కస్టమర్ ఆరోపించడంతో అక్కడ ఒక్కసారిగా కలకలం రేగింది.

చికెన్‌లో పురుగు కనిపించడంతో తీవ్ర ఆందోళనకు గురైన కస్టమర్.. వెంటనే కేఎఫ్‌సీ సిబ్బందిని నిలదీశారు. కస్టమర్లకు అందించే ఆహారాన్ని ఇంత నిర్లక్ష్యంగా ఎలా అందిస్తారని ప్రశ్నించినట్లు సమాచారం. తనకు ఎదురైన అనుభవాన్ని వీడియోలో చూపించడంతో పాటు ఘటనపై తీవ్ర అసంతృప్తి వ్యక్తం చేసినట్లు తెలుస్తోంది. దీనికి సంబంధించిన దృశ్యాలు సోషల్ మీడియాలో వైరల్‌గా మారడంతో కేఎఫ్‌సీ ఆహార నాణ్యత, పరిశుభ్రతపై చర్చ మొదలైంది.

కేఎఫ్‌సీ వంటి ప్రముఖ ఫుడ్ చైన్‌లో ఇలాంటి ఘటన చోటుచేసుకున్నట్లు ఆరోపణలు రావడం కస్టమర్లలో ఆందోళనకు కారణమవుతోంది. అయితే చికెన్‌లో కనిపించినది నిజంగా పురుగేనా, అది ఆహారంలోకి ఎలా వచ్చిందనే విషయాలపై స్పష్టత రావాల్సి ఉంది. ఘటనపై కేఎఫ్‌సీ యాజమాన్యం అధికారికంగా స్పందించాల్సి ఉంది. ఆహారం తయారీ, నిల్వ, పరిశుభ్రత విషయంలో కఠినమైన నాణ్యత ప్రమాణాలు పాటించాల్సిన అవసరాన్ని ఈ ఘటన మరోసారి గుర్తుచేస్తోంది.