Ram Pothineni: ఆమెకు అది కొన్ని నిమిషాల వీడియో కాల్ మాత్రమే కాదు.. జీవితాంతం గుర్తుండిపోయే అపురూపమైన జ్ఞాపకంగా మిగిలిపోయింది. ఆరోగ్య సమస్యలతో పోరాడుతున్న తన అభిమాని శశితో హీరో రామ్ వీడియో కాల్‌లో మాట్లాడి ధైర్యం చెప్పారు. ఈ సందర్భంగా ఆమె ఆరోగ్య పరిస్థితి గురించి రామ్ ఆరా తీశారు. అనారోగ్యంతో ఇబ్బందులు ఎదుర్కొంటున్న శశికి మనోధైర్యం కల్పిస్తూ, ఎలాంటి పరిస్థితుల్లోనూ ధైర్యంగా ఉండాలని సూచించారు.

శశి వైద్య అవసరాల గురించి కూడా రామ్ అడిగి తెలుసుకున్నారు. చికిత్సకు అవసరమైన సహాయం అందించేందుకు తాను అండగా ఉంటానని ఆమెకు భరోసా ఇచ్చారు. ఆరోగ్య సమస్యల కారణంగా ఇబ్బందులు ఎదుర్కొంటున్న సమయంలో తన అభిమాన హీరో స్వయంగా వీడియో కాల్ చేసి మాట్లాడటంతో శశి భావోద్వేగానికి గురైనట్లు తెలుస్తోంది. రామ్ చెప్పిన మాటలు ఆమెకు ఎంతో ధైర్యాన్ని, కొత్త ఆశను కలిగించాయి.

అభిమానుల పట్ల రామ్ చూపించిన ఈ ఆప్యాయత, మానవత్వం మరోసారి ఆయన గొప్ప మనసును చాటిచెప్పింది. స్టార్ హీరోగా ఎంత బిజీగా ఉన్నప్పటికీ అనారోగ్యంతో బాధపడుతున్న అభిమానితో స్వయంగా మాట్లాడి ఆమెకు ధైర్యం చెప్పడం అభిమానులను ఆకట్టుకుంది. రామ్ చేసిన ఈ చిన్న ప్రయత్నం శశి జీవితంలో మాత్రం ఎంతో విలువైన జ్ఞాపకంగా నిలిచిపోయింది.