ముక్కలైన మహా నగరం

మూడు కార్పొరేషన్లుగా హైదరాబాద్.. పూర్తయిన జీహెచ్ఎంసీ విభజన

భాగ్యనగర పాలనలో కొత్త అధ్యాయం మొదలైంది. పెరుగుతున్న జనాభా, పరిపాలనా సౌలభ్యం దృష్ట్యా ప్రభుత్వం గ్రేటర్ హైదరాబాద్ మున్సిపల్ కార్పొరేషన్ (GHMC)ను మూడు భాగాలుగా విభజిస్తూ సంచలన నిర్ణయం తీసుకుంది.

విశ్వంభర, తెలంగాణ బ్యూరో: భాగ్యనగర పాలనలో కొత్త అధ్యాయం మొదలైంది. పెరుగుతున్న జనాభా, పరిపాలనా సౌలభ్యం దృష్ట్యా ప్రభుత్వం గ్రేటర్ హైదరాబాద్ మున్సిపల్ కార్పొరేషన్ (GHMC)ను మూడు భాగాలుగా విభజిస్తూ సంచలన నిర్ణయం తీసుకుంది. ఇకపై హైదరాబాద్ మహా నగరం జీహెచ్‌ఎంసీతో పాటు కొత్తగా ఏర్పడిన సైబరాబాద్ మున్సిపల్ కార్పొరేషన్ (CMC), మల్కాజ్‌గిరి మున్సిపల్ కార్పొరేషన్ (MMC)ల పరిధిలోకి రానుంది. ఈ మేరకు ప్రభుత్వం అధికారికంగా ఉత్తర్వులు జారీ చేస్తూ, కొత్త కార్పొరేషన్ల పరిధులు, జోన్లు, సర్కిళ్లతో కూడిన సమగ్ర మ్యాప్‌లను విడుదల చేసింది. కేవలం విభజనకే పరిమితం కాకుండా, ప్రజలకు పాలనను మరింత చేరువ చేసేలా వార్డుల పునర్విభజనపై కూడా ప్రభుత్వం స్పష్టతనిచ్చింది.

6 జోన్లు.. 30 సర్కిళ్లు!

విభజన అనంతరం జీహెచ్‌ఎంసీని మొత్తం 6 జోన్లు, 30 సర్కిళ్లు, 150 వార్డులుగా ఖరారు చేశారు. నగరంలోని ప్రధాన ప్రాంతాలను కలుపుతూ శంషాబాద్, రాజేంద్రనగర్, చార్మినార్, గోల్కొండ, ఖైరతాబాద్, సికింద్రాబాద్‌లను జోన్లుగా నిర్ణయించారు. ఒక్కో జోన్ పరిధిలోకి వచ్చే సర్కిళ్ల వివరాలను ప్రభుత్వం స్పష్టంగా పేర్కొంది. శంషాబాద్ జోన్ పరిధిలో ఆదిభట్ల, బడంగ్‌పేట్, జల్‌పల్లి వంటి కీలక శివారు ప్రాంతాలను చేర్చగా, చార్మినార్ జోన్ కింద పాతబస్తీలోని సంతోష్ నగర్, యాకత్‌పురా, మలక్‌పేట, మూసారాంబాగ్‌లను ఉంచారు. రాజేంద్రనగర్ జోన్‌లో అత్తాపూర్, బహదూర్‌పుర, ఫలక్‌నుమా, చాంద్రాయణగుట్ట వంటి ప్రాంతాలు ఉండగా, గోల్కొండ జోన్ పరిధిలోకి గోషామహల్, కార్వాన్, మెహిదీపట్నం, మాసాబ్ ట్యాంక్ వంటి కీలక వ్యాపార కేంద్రాలు చేరాయి.

ఐటీ కారిడార్.. మల్కాజ్‌గిరిలకు ప్రత్యేక గుర్తింపు

ప్రభుత్వ తాజా నిర్ణయంతో ఐటీ హబ్‌గా వెలుగొందుతున్న ప్రాంతాలన్నీ ఇకపై సైబరాబాద్ మున్సిపల్ కార్పొరేషన్ (CMC) పరిధిలోకి వెళ్లనున్నాయి. అటు నగరం యొక్క తూర్పు, ఉత్తర ప్రాంతాలను అనుసంధానిస్తూ మల్కాజ్‌గిరి మున్సిపల్ కార్పొరేషన్ (MMC) ఏర్పాటు కావడంతో ఆయా ప్రాంతాల అభివృద్ధి వేగవంతం కానుంది. ఖైరతాబాద్ జోన్ పరిధిలోని జూబ్లీహిల్స్, అమీర్‌పేట, బోరబండ వంటి ప్రాంతాలు, అలాగే సికింద్రాబాద్ జోన్ కింద ముషీరాబాద్, అంబర్‌పేట్, తార్నాక వంటి నివాస ప్రాంతాల పరిధిలపై ప్రభుత్వం మ్యాప్ ద్వారా స్పష్టమైన సరిహద్దులను గీసింది. పాలన వికేంద్రీకరణ ద్వారా నిధుల కేటాయింపు, మౌలిక సదుపాయాల కల్పనలో వేగం పెరుగుతుందని అధికారులు భావిస్తున్నారు.