Harish rao: తెలంగాణకు మంజూరైన సాగునీటి ప్రాజెక్టుల అనుమతులను రద్దు చేయాలని ఆంధ్రప్రదేశ్ ప్రభుత్వం ప్రతిపాదించడం తీవ్ర ఆందోళన కలిగించే విషయమని మాజీ మంత్రి, బీఆర్ఎస్ ఎమ్మెల్యే హరీష్ రావు విమర్శించారు. కేసీఆర్ ప్రభుత్వ హయాంలో కాళేశ్వరం, సీతారామ ప్రాజెక్టులతో పాటు మొత్తం ఏడు ప్రాజెక్టులకు అనుమతులు తీసుకొచ్చామని, ఇప్పుడు వాటినే రద్దు చేయాలని ఏపీ ప్రభుత్వం జలవనరుల నిర్వహణ మండలి (జీఆర్ఎంబీ) ముందు ప్రతిపాదించడం వెనుక ఉన్న ఉద్దేశం ఏమిటని ప్రశ్నించారు.
జీఆర్ఎంబీ సమావేశ ఎజెండాలో తెలంగాణ ప్రాజెక్టుల అనుమతుల రద్దు అంశాన్ని చేర్చడంపై కూడా హరీష్ రావు అభ్యంతరం వ్యక్తం చేశారు. జీఆర్ఎంబీలో తెలంగాణకు చెందిన ఇంజనీర్లు కూడా సభ్యులుగా ఉన్నప్పుడు ఈ అంశం ఎజెండాలోకి ఎలా వచ్చిందని ప్రశ్నించారు. ఈ విషయాన్ని అధికారులు ముఖ్యమంత్రి రేవంత్ రెడ్డికి తెలియజేశారా? లేక తెలిసినా ప్రభుత్వం పట్టించుకోలేదా? అని నిలదీశారు.

కాంగ్రెస్ ప్రభుత్వం అధికారంలోకి వచ్చిన తర్వాత మూడేళ్లలో ఒక్క కొత్త ప్రాజెక్టుకూ అనుమతులు తీసుకురాలేదని, పైగా గత బీఆర్ఎస్ ప్రభుత్వం సాధించిన అనుమతులను కూడా కోల్పోయే పరిస్థితి తీసుకొచ్చిందని హరీష్ రావు ఆరోపించారు. ఇది ప్రభుత్వ వైఫల్యానికి నిదర్శనమని, తెలంగాణ ప్రయోజనాల పరిరక్షణలో ప్రభుత్వం పూర్తిగా విఫలమైందని విమర్శించారు.

ఆంధ్రప్రదేశ్ ముఖ్యమంత్రి చంద్రబాబు నాయుడు తెలంగాణ ప్రజల నీటి హక్కులను దెబ్బతీయాలని ప్రయత్నిస్తున్నారని హరీష్ రావు ఆరోపించారు. తెలంగాణను ఎన్నో పోరాటాలతో సాధించుకున్నామని, నీటి విషయంలో ఎలాంటి అన్యాయం జరిగినా ప్రజలు సహించరని హెచ్చరించారు. తెలంగాణ ప్రాజెక్టులను అడ్డుకునే ప్రయత్నాలను వెంటనే విరమించుకోవాలని, లేకపోతే రాష్ట్ర ప్రజలు బలంగా స్పందిస్తారని అన్నారు.