CMF Watch 3 Pro Review: బడ్జెట్ ధరలో మంచి స్మార్ట్‌వాచ్ కొనాలనుకునే వారికి మార్కెట్లో ఎన్నో ఎంపికలు ఉన్నప్పటికీ, నాణ్యత, పనితీరు, ఫీచర్ల పరంగా మెప్పించే మోడళ్లు చాలా తక్కువగా ఉంటాయి. ముఖ్యంగా రూ.10 వేల లోపు లభించే చాలా స్మార్ట్‌వాచ్‌లలో నాసిరకం నిర్మాణ నాణ్యత, నెమ్మదిగా పనిచేసే సాఫ్ట్‌వేర్, తక్కువ బ్యాటరీ బ్యాకప్ వంటి సమస్యలు కనిపిస్తుంటాయి. అయితే నథింగ్ అనుబంధ బ్రాండ్ సీఎంఎఫ్ తాజాగా విడుదల చేసిన సీఎంఎఫ్ వాచ్ 3 ప్రో ఈ లోటును భర్తీ చేసే ప్రయత్నం చేసింది. రూ.8 వేలలోపు ధరలోనే ప్రీమియం డిజైన్, ఆకర్షణీయమైన ఫీచర్లు, ఎక్కువ బ్యాటరీ బ్యాకప్‌తో ఈ స్మార్ట్‌వాచ్ వినియోగదారుల దృష్టిని ఆకర్షిస్తోంది.

ప్రీమియం అనుభూతి

సీఎంఎఫ్ వాచ్ 3 ప్రోను తొలిసారి చేతిలోకి తీసుకున్నప్పుడే ప్రీమియం అనుభూతి కలుగుతుంది. మెటల్ ఫ్రేమ్, పెద్ద అమోలెడ్ డిస్‌ప్లే, సన్నని అంచులతో ఈ వాచ్ ఖరీదైన స్మార్ట్‌వాచ్‌లను తలపిస్తుంది. డిస్‌ప్లే ప్రకాశం కూడా మంచి స్థాయిలో ఉండటంతో ఎండలోనూ సమాచారం స్పష్టంగా కనిపిస్తుంది. వాచ్‌లోని మెనూలు, యానిమేషన్లు సాఫీగా పనిచేయడం వల్ల వినియోగదారులకు మంచి అనుభవం లభిస్తుంది. బడ్జెట్ స్మార్ట్‌వాచ్‌లలో సాధారణంగా కనిపించే ఆలస్యం (ల్యాగ్) సమస్య ఇందులో చాలా వరకు కనిపించదని సమీక్షలు చెబుతున్నాయి.

ఉపయోగకరమైన ఫీచర్లు

ఆరోగ్యం, ఫిట్‌నెస్‌పై శ్రద్ధ పెట్టే వారి కోసం ఈ వాచ్‌లో పలు ఉపయోగకరమైన ఫీచర్లు ఉన్నాయి. గుండె స్పందనను గుర్తించే సెన్సార్, రక్తంలోని ఆక్సిజన్ స్థాయిని కొలిచే సదుపాయం, నిద్ర విశ్లేషణ, ఒత్తిడి స్థాయి అంచనా, రోజువారీ కార్యకలాపాల నమోదు, వందలాది క్రీడా మోడ్‌లు ఇందులో అందుబాటులో ఉన్నాయి. అలాగే బ్లూటూత్ కాలింగ్, మొబైల్ నోటిఫికేషన్లు, వాతావరణ సమాచారం, సంగీత నియంత్రణ, మొబైల్ కెమెరా నియంత్రణ వంటి స్మార్ట్ ఫీచర్లు కూడా ఉన్నాయి. రోజువారీ వినియోగంలో ఇవన్నీ ఎంతో ఉపయోగపడతాయి.

బ్యాటరీ సామర్థ్యం

ఈ వాచ్‌లో మరో ప్రధాన ఆకర్షణ బ్యాటరీ సామర్థ్యం. ఒకసారి పూర్తిగా ఛార్జ్ చేస్తే సాధారణ వినియోగంలో చాలా రోజుల పాటు పనిచేస్తుందని సమీక్షల్లో వెల్లడైంది. తరచూ ఛార్జింగ్ చేయాల్సిన అవసరం లేకపోవడం ఉద్యోగులు, విద్యార్థులు, తరచూ ప్రయాణాలు చేసే వారికి పెద్ద ప్రయోజనంగా మారుతుంది.

ప్రత్యేక ఫీచర్లు

అయితే ఈ వాచ్‌ను యాపిల్ వాచ్, శాంసంగ్ గెలాక్సీ వాచ్, గార్మిన్ వంటి అత్యాధునిక ప్రీమియం స్మార్ట్‌వాచ్‌లతో పోల్చడం సరికాదు. ఎందుకంటే వాటిలో ఉండే ఈసీజీ పరీక్ష, అత్యాధునిక ఆరోగ్య సెన్సర్లు, ఎల్‌టీఈ కనెక్టివిటీ వంటిదు ప్రత్యేక ఫీచర్లు ఇంలో లేవు. అయినప్పటికీ ఈ ధరలో లభించే ఇతర స్మార్ట్‌వాచ్‌లతో పోలిస్తే సీఎంఎఫ్ వాచ్ 3 ప్రో మెరుగైన డిజైన్, వేగవంతమైన పనితీరు, మంచి బ్యాటరీ బ్యాకప్, ఖచ్చితమైన ఫిట్‌నెస్ ట్రాకింగ్‌ను అందిస్తోందని టెక్ నిపుణులు అభిప్రాయపడుతున్నారు. తక్కువ ధరలో ప్రీమియం అనుభూతిని అందిస్తూ బడ్జెట్ స్మార్ట్‌వాచ్ విభాగంలో గట్టి పోటీదారుగా నిలుస్తోంది.