తెలంగాణ కాంగ్రెస్‌లో కేబినెట్ ప్రక్షాళన ప్రచారం.. కీలక నేతల పేర్లు తెరపైకి

Telangana Congress: తెలంగాణ కాంగ్రెస్‌లో మరోసారి మంత్రి పదవులు, శాఖల మార్పులపై చర్చ జోరందుకుంది. అసెంబ్లీ వర్షాకాల సమావేశాలు ముగిసిన తర్వాత రాష్ట్ర కేబినెట్‌లో భారీ ప్రక్షాళన ఉండొచ్చన్న ప్రచారం రాజకీయ వర్గాల్లో సాగుతోంది. ముఖ్యంగా నలుగురు మంత్రులను కేబినెట్‌ నుంచి తప్పించే అంశంపై సీఎం శిబిరంలో చర్చ జరుగుతున్నట్లు పార్టీ వర్గాల్లో ప్రచారం జరుగుతోంది. ఈ చర్చలో దళిత మంత్రి అడ్లూరి లక్ష్మణ్‌తో పాటు బీసీ మంత్రులు కొండా సురేఖ, పొన్నం ప్రభాకర్, మంత్రి జూపల్లి కృష్ణారావు పేర్లు వినిపిస్తున్నాయి. అయితే ఈ మార్పులపై ఇప్పటివరకు అధికారికంగా ఎలాంటి ప్రకటన వెలువడలేదు.

ఇదే సమయంలో కేబినెట్‌లోకి కొత్తగా ఎవరిని తీసుకోవాలనే దానిపైనా పలు ప్రతిపాదనలు ఉన్నట్లు ప్రచారం జరుగుతోంది. స్పీకర్ గడ్డం ప్రసాద్‌కుమార్‌ను మంత్రివర్గంలోకి తీసుకుని, ఆయన స్థానంలో అడ్లూరి లక్ష్మణ్‌ను స్పీకర్‌గా నియమించాలనే ప్రతిపాదన ఉన్నట్లు సమాచారం. కొండా సురేఖను కేబినెట్ నుంచి తప్పించే అంశంపై ఢిల్లీ స్థాయిలో ప్రయత్నాలు జరుగుతున్నాయన్న ప్రచారం కూడా వినిపిస్తోంది. సీఎం రేవంత్‌రెడ్డి ఢిల్లీలో ఏఐసీసీ సంస్థాగత వ్యవహారాల ప్రధాన కార్యదర్శి కేసీ వేణుగోపాల్‌ను కలిసి సురేఖ వ్యవహారానికి సంబంధించిన ఆధారాలు అందించినట్లు కొన్ని కథనాలు పేర్కొంటున్నాయి. జూపల్లి కృష్ణారావు స్థానంలో ప్రేమ్‌సాగర్‌రావుకు అవకాశం కల్పించాలన్న ప్రతిపాదన ఉందనే చర్చ కూడా కాంగ్రెస్ వర్గాల్లో సాగుతోంది. మరోవైపు పొన్నం ప్రభాకర్‌ను తప్పించే ప్రయత్నాలు జరుగుతున్నప్పటికీ.. పార్టీ అధిష్ఠానం అందుకు అంగీకరించడం లేదన్న సమాచారం కూడా వినిపిస్తోంది. పొన్నం స్థానంలో పీసీసీ అధ్యక్షుడు మహేశ్‌కుమార్‌గౌడ్‌ పేరును సీఎం శిబిరం ప్రతిపాదించినట్లు ప్రచారం జరుగుతోంది.

మంత్రి పదవులతో పాటు శాఖల మార్పులపైనా కాంగ్రెస్‌లో కసరత్తు జరుగుతున్నట్లు తెలుస్తోంది. మంత్రి దుద్దిళ్ల శ్రీధర్‌బాబుకు ఆర్థిక శాఖ అప్పగించే అవకాశం ఉందన్న ప్రచారం ఉండగా.. ప్రస్తుతం నీటిపారుదల శాఖ నిర్వహిస్తున్న ఉత్తమ్‌కుమార్‌రెడ్డి రెవెన్యూ శాఖను కోరుతున్నట్లు చర్చ జరుగుతోంది. మంత్రి పొంగులేటి శ్రీనివాస్‌రెడ్డి శాఖ మార్పుపైనా పార్టీ వర్గాల్లో చర్చ సాగుతున్నట్లు సమాచారం. రెవెన్యూ శాఖను మార్చినట్లయితే మున్సిపల్ శాఖ ఇవ్వాలని పొంగులేటి కోరుతున్నట్లు ప్రచారం జరుగుతోంది. ఇక ఉమ్మడి రంగారెడ్డి జిల్లా నుంచి మల్‌రెడ్డి రంగారెడ్డి, రామ్మోహన్‌రెడ్డి మంత్రి పదవుల కోసం ప్రయత్నాలు చేస్తున్నట్లు వార్తలు వస్తున్నాయి. కోమటిరెడ్డి రాజగోపాల్‌రెడ్డి పేరు కూడా బలంగా వినిపిస్తోంది. ఆయనకు మంత్రి పదవి ఇస్తే ఉత్తమ్‌కుమార్‌రెడ్డి భార్య పద్మావతికి డిప్యూటీ స్పీకర్ పదవి ఇచ్చే అవకాశం ఉందన్న ప్రచారం ఉంది. రామ్మోహన్‌రెడ్డికి చీఫ్ విప్ పదవి దక్కవచ్చన్న చర్చ కూడా సాగుతోంది. మొత్తంగా అసెంబ్లీ సమావేశాల అనంతరం రెవెన్యూ, నీటిపారుదల, పరిశ్రమలు, పురపాలక శాఖలతో పాటు కేబినెట్‌లోనూ కీలక మార్పులు చోటుచేసుకునే అవకాశాలపై కాంగ్రెస్‌లో ఉత్కంఠ నెలకొంది. అయితే ఇవన్నీ ప్రస్తుతం పార్టీ వర్గాల్లో వినిపిస్తున్న ప్రచారాలే కాగా.. తుది నిర్ణయం కాంగ్రెస్ అధిష్ఠానం, సీఎం రేవంత్‌రెడ్డి నిర్ణయంపై ఆధారపడి ఉంటుంది.