జగిత్యాల–కరీంనగర్‌ రోడ్డుపై నిలిచిపోయిన ఎలక్ట్రిక్‌ బస్సు.. ప్రయాణికుల అవస్థలు

Karimnagar Electric Bus: జగిత్యాల–కరీంనగర్‌ ప్రధాన రహదారిపై కరీంనగర్‌ డిపోకు చెందిన ఎలక్ట్రిక్‌ బస్సు సాంకేతిక సమస్యతో నిలిచిపోయింది. జగిత్యాల నుంచి కరీంనగర్‌ వెళ్తుండగా మల్యాల ఎక్స్‌రోడ్డు వద్ద బస్సులో సమస్య తలెత్తింది. దీంతో బస్సును రోడ్డుపక్కన నిలిపివేయాల్సి వచ్చింది. బస్సు ఒక్కసారిగా ఆగిపోవడంతో అందులో ప్రయాణిస్తున్న ప్రయాణికులు ఇబ్బందులు ఎదుర్కొన్నారు.

బస్సులో పరిమితికి మించి ప్రయాణికులను ఎక్కించడం వల్లే సాంకేతిక సమస్య తలెత్తిందని కొందరు ప్రయాణికులు ఆరోపించారు. అయితే అసలు కారణం ఏమిటనేది అధికారులు స్పష్టం చేయాల్సి ఉంది. బస్సు నిలిచిపోవడంతో ప్రయాణికులను మరో బస్సులో తరలించేందుకు కండక్టర్‌ ప్రయత్నించారు. కానీ మల్యాల ఎక్స్‌రోడ్డు వద్ద ఇతర బస్సులు ఆగకపోవడంతో ప్రయాణికులకు ఇబ్బందులు తప్పలేదు.

చేసేదేమీ లేక కొందరు ప్రయాణికులు బస్సును పక్కకు నిలిపి వేరే బస్సులు, ప్రైవేట్‌ వాహనాలను ఆశ్రయించారు. మరికొందరు ప్రయాణికులు రోడ్డుపైనే కొంతసేపు వేచి చూడాల్సి వచ్చింది. ఎలక్ట్రిక్‌ బస్సుల్లో తరచూ సాంకేతిక సమస్యలు తలెత్తకుండా అధికారులు ముందస్తు తనిఖీలు నిర్వహించాలని, బస్సు నిలిచిపోయిన సమయంలో ప్రయాణికులను వెంటనే ప్రత్యామ్నాయ బస్సుల్లో గమ్యస్థానాలకు చేర్చేలా చర్యలు తీసుకోవాలని ప్రయాణికులు కోరుతున్నారు.