పీజీఆర్‌ఎస్ ఫిర్యాదులను సకాలంలో పరిష్కరిస్తున్నాం: ఎమ్మార్వో రాజ

Anantapur News,: అనంతపురం అర్బన్‌ మండలం తహసీల్దార్‌ కార్యాలయ పరిధిలో ప్రజా సమస్యల పరిష్కార వేదిక (పీజీఆర్‌ఎస్‌)కు ఆగస్టు నెలలో మొత్తం 23 అర్జీలు అందినట్లు అర్బన్‌ ఎమ్మార్వో డి. రాజ తెలిపారు. ప్రజలు వివిధ సమస్యలపై అందించిన అర్జీలను పరిశీలించి, వాటిలో 19 సమస్యలను నిర్ణీత సమయంలోనే పరిష్కరించినట్లు వెల్లడించారు.

వచ్చిన అర్జీల్లో సివిల్‌ సప్లైస్‌కు సంబంధించినవి 9, ఇంటి స్థలాలకు సంబంధించినవి 8, కుల ధ్రువీకరణ పత్రానికి సంబంధించినది ఒకటి, ఇతర సమస్యలకు సంబంధించి 5 అర్జీలు ఉన్నట్లు అధికారులు తెలిపారు. ఆయా సమస్యలను సంబంధిత శాఖల సమన్వయంతో పరిశీలించి పరిష్కార చర్యలు చేపట్టినట్లు పేర్కొన్నారు. మిగిలిన అర్జీలను కూడా నిర్ణీత గడువులోగా పరిష్కరించేందుకు చర్యలు తీసుకుంటామని ఎమ్మార్వో డి. రాజ తెలిపారు.

మరోవైపు నకిలీ ఇంటి పట్టాల వ్యవహారంపై కూడా అధికారులు దృష్టి సారించారు. నకిలీ ఇంటి పట్టాల పేరుతో సామాన్య ప్రజలు మోసపోకుండా ప్రత్యేక కార్యాచరణను త్వరలో అమల్లోకి తీసుకురానున్నట్లు ఎమ్మార్వో తెలిపారు. ప్రజలు అప్రమత్తంగా ఉండాలని, అనుమానాస్పద పత్రాల విషయంలో సంబంధిత అధికారులను సంప్రదించాలని సూచించారు. ప్రజా సమస్యలను సకాలంలో పరిష్కరించడంతో పాటు నకిలీ పట్టాల మోసాలకు అడ్డుకట్ట వేసేలా చర్యలు తీసుకుంటామని అధికారులు వెల్లడించారు.