Anantapur Buddappa Nagar: అనంతపురం నగరంలోని బుడ్డప్పనగర్ హెచ్‌పీ గ్యాస్ ఏజెన్సీపై డెలివరీ చార్జీల పేరుతో అదనపు డబ్బులు వసూలు చేస్తున్నారంటూ వినియోగదారులు ఆరోపిస్తున్నారు. ప్రభుత్వం నిర్ణయించిన ధరకు సంబంధించిన బిల్లును అందించినప్పటికీ, గ్యాస్ సిలిండర్‌ను ఇంటి వద్దకు డెలివరీ చేసే సమయంలో డెలివరీ బాయ్స్ అదనంగా రూ.40 వసూలు చేస్తున్నారని బాధితులు ఆవేదన వ్యక్తం చేస్తున్నారు.

గ్యాస్ ధరల పెరుగుదలతో ఇప్పటికే ఇబ్బందులు పడుతున్న సామాన్య ప్రజలపై డెలివరీ చార్జీల పేరుతో అదనపు భారం మోపడం సరికాదని వినియోగదారులు మండిపడుతున్నారు. బిల్లులో చూపించిన మొత్తానికి అదనంగా నగదు చెల్లించాల్సి వస్తోందని, డెలివరీ బాయ్స్ డబ్బులు అడుగుతున్నారని ఆరోపిస్తున్నారు. దీనిపై ప్రశ్నిస్తే డెలివరీ చార్జీలంటూ సమాధానం ఇస్తున్నారని కొందరు వినియోగదారులు పేర్కొన్నారు.

గ్యాస్ సిలిండర్ ధరలోనే డెలివరీకి సంబంధించిన నిబంధనలు ఉన్నప్పటికీ, అదనంగా నగదు వసూలు చేస్తున్నారనే ఆరోపణలపై సంబంధిత అధికారులు దృష్టి సారించాలని వినియోగదారులు కోరుతున్నారు. ముఖ్యంగా ప్రభుత్వం నిర్ణయించిన ధరకు అదనంగా వసూలు చేస్తున్నారా? అలా అయితే ఎవరి ఆదేశాలతో వసూళ్లు జరుగుతున్నాయి? అనే అంశాలపై అధికారులు విచారణ చేపట్టాలని డిమాండ్ చేస్తున్నారు.

డెలివరీ బాయ్స్ అదనపు నగదు వసూలు చేస్తున్నారంటూ గతంలోనూ పలు సందర్భాల్లో ఫిర్యాదులు, వార్తా కథనాలు వచ్చినప్పటికీ సంబంధిత అధికారులు తగిన చర్యలు తీసుకోవడం లేదని వినియోగదారులు ఆరోపిస్తున్నారు. ప్రజల నుంచి వచ్చే ఫిర్యాదులపై అధికారులు స్పందించి, గ్యాస్ ఏజెన్సీల్లో నిబంధనలకు విరుద్ధంగా అదనపు వసూళ్లు జరుగుతున్నాయా లేదా అనే విషయాన్ని తనిఖీ చేయాలని కోరుతున్నారు.

ప్రభుత్వం నిర్ణయించిన ధరకు మాత్రమే గ్యాస్ సిలిండర్ అందేలా చర్యలు తీసుకోవాలని, అదనంగా డబ్బులు వసూలు చేస్తున్నట్లు నిర్ధారణ అయితే సంబంధిత డెలివరీ సిబ్బందిపై, ఏజెన్సీపై నిబంధనల ప్రకారం చర్యలు తీసుకోవాలని వినియోగదారులు విజ్ఞప్తి చేస్తున్నారు. ఈ ఆరోపణలపై సంబంధిత గ్యాస్ ఏజెన్సీ, అధికారులు స్పందించాల్సి ఉంది.