విశ్వంభర, హైదరాబాద్, ఆగస్టు 13: బీసీ మహిళలను ఆర్థికంగా స్వావలంబన దిశగా నడిపించేందుకు తెలంగాణ ప్రభుత్వం ప్రారంభించిన ‘ఇంటింటా ఇందిరమ్మ కుట్టు మిషన్లు’ పథకం చారిత్రాత్మక నిర్ణయమని తెలంగాణ పద్మశాలి కార్పొరేషన్ చైర్మన్ గూడూరు శ్రీనివాస్ అన్నారు.119 నియోజకవర్గాల్లో 1.19 లక్షల ఆటోమేటిక్ కుట్టు మిషన్లను 100 శాతం సబ్సిడీపై అందించడం ద్వారా పేద, మధ్యతరగతి బీసీ మహిళలకు ఇంటి నుంచే స్వయం ఉపాధి పొందే గొప్ప అవకాశం లభిస్తుందని ఆయన తెలిపారు.
ముఖ్యమంత్రి ఎ. రేవంత్ రెడ్డి, బీసీ సంక్షేమ శాఖ మంత్రి పొన్నం ప్రభాకర్ ఆధ్వర్యంలో బీసీ మహిళల ఆర్థిక సాధికారత కోసం ప్రభుత్వం తీసుకుంటున్న చర్యలు అభినందనీయమని గూడూరు శ్రీనివాస్ పేర్కొన్నారు.పద్మశాలి మహిళలకు ఎంతో ప్రయోజనం
కుట్టు వృత్తిపై ఆధారపడి జీవించే పద్మశాలి కుటుంబాలు రాష్ట్రవ్యాప్తంగా పెద్ద సంఖ్యలో ఉన్నాయని, ఈ పథకం ద్వారా పద్మశాలి మహిళలకు కూడా ఎంతో ప్రయోజనం కలుగుతుందని గూడూరు శ్రీనివాస్ అన్నారు.ఒక్కో కుట్టు మిషన్ విలువ రూ.12,000 కాగా, లబ్ధిదారులపై ఎలాంటి ఆర్థిక భారం లేకుండా 100 శాతం సబ్సిడీపై అందించడం పేద మహిళలకు ప్రభుత్వం అందిస్తున్న గొప్ప సహకారమని అన్నారు.మహిళలు ఇంటి వద్దనే కుట్టు పని చేసుకుంటూ కుటుంబానికి అదనపు ఆదాయం సమకూర్చుకోవడంతో పాటు, భవిష్యత్తులో చిన్న స్థాయి వ్యాపారవేత్తలుగా ఎదగడానికి ఈ పథకం ఉపయోగపడుతుందని తెలిపారు.అర్హులైన మహిళలు దరఖాస్తు చేసుకోవాలిఆగస్టు 15 నుంచి సెప్టెంబర్ 15 వరకు దరఖాస్తులు స్వీకరిస్తున్నందున అర్హులైన బీసీ మహిళలు ఈ అవకాశాన్ని సద్వినియోగం చేసుకోవాలని గూడూరు శ్రీనివాస్ పిలుపునిచ్చారు.అత్యంత పేదలు, వితంతువులు, ఒంటరి మహిళలు, వికలాంగులు, నిరుద్యోగ మహిళలు, కుట్టు వృత్తిలో అనుభవం ఉన్న వారికి నిబంధనల ప్రకారం ప్రాధాన్యత కల్పించడం స్వాగతించదగ్గ విషయమన్నారు.లబ్ధిదారుల ఎంపిక పారదర్శకంగా జరగాలని, అర్హులైన ప్రతి మహిళకు న్యాయం జరిగేలా అధికారులు చర్యలు తీసుకోవాలని ఆయన కోరారు.బీసీ మహిళల సాధికారతే ప్రభుత్వ లక్ష్యం
బీసీ మహిళలకు కేవలం సంక్షేమ పథకాలు అందించడం కాకుండా స్థిరమైన ఆదాయం వచ్చేలా స్వయం ఉపాధి అవకాశాలు కల్పించడమే నిజమైన ఆర్థిక సాధికారత అని గూడూరు శ్రీనివాస్ అన్నారు.కుట్టు మిషన్లతో పాటు మహిళలకు అవసరమైన శిక్షణ, మార్కెటింగ్ అవకాశాలు, వారి ఉత్పత్తులకు మార్కెట్ కల్పించే చర్యలు చేపడితే ఈ పథకం మరింత విజయవంతమవుతుందని సూచించారు.తెలంగాణలోని బీసీ మహిళల అభివృద్ధికి పద్మశాలి కార్పొరేషన్ తరఫున తన వంతు సహకారం అందిస్తానని ఆయన తెలిపారు.పూలే దంపతుల విగ్రహాల ఆవిష్కరణకు తరలిరావాలిమహాత్మా జ్యోతిబాపూలే, సావిత్రిబాయి పూలే విగ్రహాల ఆవిష్కరణ కార్యక్రమాన్ని విజయవంతం చేయాలని గూడూరు శ్రీనివాస్ పిలుపునిచ్చారు.సామాజిక న్యాయం, విద్య, మహిళా సాధికారత కోసం జీవితాలను అంకితం చేసిన పూలే దంపతుల సేవలను ప్రతి ఒక్కరూ స్మరించుకోవాలని అన్నారు.కార్యక్రమాల్లో బీసీ ప్రజాప్రతినిధులు, కుల సంఘాల నాయకులు, బీసీ యువత, మహిళలు పెద్ద సంఖ్యలో పాల్గొని విజయవంతం చేయాలని గూడూరు శ్రీనివాస్ కోరారు.
బీసీ మహిళల ఆర్థిక స్వావలంబన, సామాజిక అభివృద్ధి కోసం తెలంగాణ ప్రభుత్వం చేపడుతున్న ప్రతి కార్యక్రమానికి పద్మశాలి కార్పొరేషన్ పూర్తి సహకారం అందిస్తుందని గూడూరు శ్రీనివాస్ స్పష్టం చేశారు.