హైదరాబాద్‌ ధరణి చౌక్‌లో స్కాలర్‌షిప్‌ల కోసం విద్యార్థుల ధర్నా

Hyderabad Dharna Chowk: స్కాలర్‌షిప్‌లు, ఫీజు రీయింబర్స్‌మెంట్‌ బకాయిలను వెంటనే విడుదల చేయాలని డిమాండ్ చేస్తూ ఏబీవీపీ ఆధ్వర్యంలో హైదరాబాద్‌ ధరణి చౌక్‌లో నిరసన చేపట్టారు. ఈ ఆందోళనలో విద్యార్థులు పాల్గొని తమ సమస్యలను వెల్లడించారు. చదువుకు సంబంధించిన ఫీజుల చెల్లింపులు ఆలస్యం కావడంతో విద్యార్థులు, వారి కుటుంబాలు ఇబ్బందులు ఎదుర్కొంటున్నాయని ఆవేదన వ్యక్తం చేశారు.

మూడు సంవత్సరాలుగా స్కాలర్‌షిప్‌ పెండింగ్‌లో ఉందని కొందరు విద్యార్థులు తెలిపారు. నాలుగో ఏడాదిలో కేవలం రూ.35 వేల వరకు మాత్రమే స్కాలర్‌షిప్‌ అందిందని, మిగిలిన బకాయిల పరిస్థితి ఏమిటని ప్రశ్నించారు. విద్యార్థుల నుంచి ఫీజులు వసూలు చేస్తున్నప్పటికీ ప్రభుత్వం నుంచి రావాల్సిన ఫీజు రీయింబర్స్‌మెంట్‌ సకాలంలో అందకపోవడంతో తమ చదువులు, తదుపరి విద్యా అవకాశాలపై ప్రభావం పడుతోందని వారు పేర్కొన్నారు.

స్కాలర్‌షిప్‌లు, ఫీజు రీయింబర్స్‌మెంట్‌కు సంబంధించిన పెండింగ్‌ మొత్తాలను వెంటనే విడుదల చేయాలని ఏబీవీపీ డిమాండ్ చేసింది. విద్యార్థుల సమస్యలను ప్రభుత్వం పరిష్కరించి, బకాయిల చెల్లింపులపై స్పష్టత ఇవ్వాలని కోరింది. చదువును కొనసాగించేందుకు ఆర్థికంగా ఇబ్బందులు పడుతున్న విద్యార్థులకు ప్రభుత్వం తక్షణమే అండగా నిలవాలని నిరసనలో పాల్గొన్న విద్యార్థులు విజ్ఞప్తి చేశారు.