విశ్వంభర, తొర్రూరు: ప్రజా సేవకు అంకితమై మూడు దశాబ్దాలుగా ప్రజలకు సేవలందిస్తున్న టీపీసీసీ ఉపాధ్యక్షురాలు, పాలకుర్తి నియోజకవర్గ కాంగ్రెస్‌ ఇన్‌ఛార్జి హనుమాండ్ల ఝాన్సీ రాజేందర్‌రెడ్డి జీవితం ఆదర్శప్రాయమని తొర్రూరు మున్సిపల్‌ చైర్మన్‌ తూనం శ్రావణ్‌కుమార్‌ అన్నారు. శనివారం తొర్రూరు కాంగ్రెస్‌ పార్టీ కార్యాలయంలో ఝాన్సీ రాజేందర్‌రెడ్డి దంపతుల వివాహ వార్షికోత్సవ వేడుకలను కాంగ్రెస్‌ నాయకులు ఘనంగా నిర్వహించారు. పార్టీ మండల అధ్యక్షుడు మోత్కూరి రవీంద్రచారి, పట్టణ అధ్యక్షుడు ముద్దసాని సురేష్‌ ఆధ్వర్యంలో కేక్‌ కట్‌ చేసి దంపతులకు శుభాకాంక్షలు తెలిపారు. ఈ సందర్భంగా శ్రావణ్‌కుమార్‌ మాట్లాడుతూ ఝాన్సీ రాజేందర్‌రెడ్డి దంపతులు పాలకుర్తి నియోజకవర్గంలో అనేక సేవా కార్యక్రమాలు నిర్వహించి ప్రజల మన్ననలు పొందారని తెలిపారు. వారి సేవలను గుర్తించిన ప్రజలు వారి కుటుంబానికి ఎమ్మెల్యే పదవిని అప్పగించారని పేర్కొన్నారు. ఝాన్సీ రాజేందర్‌రెడ్డి దిశానిర్దేశంలో, ఎమ్మెల్యే యశస్వినిరెడ్డి నాయకత్వంలో పాలకుర్తి నియోజకవర్గం మరింత అభివృద్ధి చెందుతుందని ఆశాభావం వ్యక్తం చేశారు.  కార్యక్రమంలో కాంగ్రెస్‌ నాయకులు, కార్యకర్తలు, అభిమానులు పాల్గొని ఝాన్సీ రాజేందర్‌రెడ్డి దంపతులకు శుభాకాంక్షలు తెలిపారు.