గణనాథుడి చెంత మూషికం: సీలేరులో అరుదైన దృశ్యం

Seeleru Ganesh Festival: అల్లూరి సీతారామరాజు జిల్లా సీలేరులో వినాయక చవితి వేడుకల సందర్భంగా ఆసక్తికర దృశ్యం భక్తులను ఆకట్టుకుంటోంది. సీలేరు గిరిజన బాలికల ఆశ్రమ పాఠశాల గణేష్ మండపంలో ఓ మూషికం వినాయకుడి విగ్రహం చుట్టూ తిరుగుతూ కనిపిస్తోంది. దీంతో ఈ దృశ్యాన్ని చూసేందుకు స్థానికులు ఆసక్తిగా తరలివస్తున్నారు.

వినాయక చవితి రోజు నుంచి మూషికం గణనాథుడి విగ్రహం చుట్టూ తిరుగుతూ, స్వామివారి చెంతనే ఉంటున్నట్లు స్థానికులు చెబుతున్నారు. సాధారణంగా జనసంచారం, శబ్దాలకు దూరంగా ఉండే మూషికం.. భక్తులు పెద్ద సంఖ్యలో ఉన్నా, పూజలు జరుగుతున్నా అక్కడి నుంచి వెళ్లకుండా విగ్రహం చుట్టూనే సంచరిస్తుండటం అందరినీ ఆశ్చర్యపరుస్తోంది.

మండపంలో భక్తులు పూజలు నిర్వహించడం, పెద్ద ఎత్తున శబ్దాలు వినిపిస్తున్నప్పటికీ మూషికం ఏమాత్రం భయపడకుండా గణపతి విగ్రహం వద్దే ఉండటం ప్రత్యేకంగా మారింది. ఈ దృశ్యాన్ని పలువురు తమ ఫోన్లలో చిత్రీకరిస్తూ సామాజిక మాధ్యమాల్లో పంచుకుంటున్నారు. వినాయకుడి వాహనంగా భావించే మూషికం ఇలా స్వామివారి చెంత కనిపించడంతో భక్తులు దీనిని ఆసక్తిగా తిలకిస్తున్నారు.

తొలి పూజల సమయంలో గణనాథుడి ఆశీస్సులు పొందడంతో పాటు ఈ అరుదైన దృశ్యాన్ని చూసేందుకు స్థానికులు పెద్ద సంఖ్యలో గణేష్ మండపానికి వస్తున్నారు. సీలేరు ప్రాంతంలో ప్రస్తుతం ఈ మూషికం చుట్టూ ఆసక్తికర చర్చ సాగుతోంది. భక్తులకు ప్రత్యేక అనుభూతిని కలిగిస్తున్న ఈ దృశ్యం వినాయక చవితి వేడుకలకు మరింత ప్రత్యేకతను తీసుకొచ్చింది.