India Monsoon: ప్రపంచ వాతావరణ పరిస్థితులపై మరోసారి ఆందోళనకర హెచ్చరిక వెలువడింది. ప్రపంచ వాతావరణ సంస్థ (డబ్ల్యూఎంఓ) సూపర్ ఎల్‌నినో ప్రభావం రానున్న వారాల్లో మరింత బలపడే అవకాశం ఉందని వెల్లడించింది. ముఖ్యంగా ఆగస్టు నుంచి అక్టోబర్ వరకు ప్రపంచవ్యాప్తంగా ఉష్ణోగ్రతలు అసాధారణ స్థాయిలో పెరగడంతో పాటు, పలు ప్రాంతాల్లో కరువు, మరికొన్ని ప్రాంతాల్లో భారీ వర్షాలు, వరదలు, కార్చిచ్చులు వంటి తీవ్ర వాతావరణ పరిస్థితులు ఏర్పడే ప్రమాదం ఉందని హెచ్చరించింది. వాతావరణ మార్పుల ప్రభావంతో ఇప్పటికే అనేక దేశాలు ఇబ్బందులు ఎదుర్కొంటుండగా, ఎల్‌నినో పరిస్థితులను మరింత క్లిష్టంగా మార్చే అవకాశం ఉందని నిపుణులు పేర్కొంటున్నారు.

భారత్‌లో కూడా ఎల్‌నినో ప్రభావం స్పష్టంగా కనిపించే అవకాశముందని వాతావరణ నిపుణులు అంచనా వేస్తున్నారు. ఈ ఏడాది రుతుపవనాల కాలంలో సాధారణం కంటే తక్కువ వర్షపాతం నమోదయ్యే అవకాశం ఉందని చెబుతున్నారు. ముఖ్యంగా మధ్య భారతదేశం, దక్షిణ ద్వీపకల్పం, వాయువ్య ప్రాంతాల్లో వర్షాల కొరత కారణంగా తేమ తగ్గి కరువు పరిస్థితులు ఏర్పడే ప్రమాదం ఉంది. మరోవైపు ఈశాన్య రాష్ట్రాలు, ముఖ్యంగా అస్సాం ప్రాంతంలో భారీ వర్షాలు, వరదల ముప్పు కొనసాగవచ్చని హెచ్చరిస్తున్నారు. వర్షాల అసమాన పంపిణీ కారణంగా వ్యవసాయం, తాగునీటి వనరులు, విద్యుత్ ఉత్పత్తిపై కూడా ప్రభావం పడే అవకాశం ఉందని అధికారులు సూచిస్తున్నారు.

ప్రపంచవ్యాప్తంగా ఇప్పటికే ఎల్‌నినో ప్రభావం కనిపిస్తోంది. ఐరోపాలో తీవ్ర ఉష్ణోగ్రతలు, అడవి కార్చిచ్చులు ప్రజలను భయాందోళనకు గురిచేస్తుండగా, కొన్ని దేశాలు అత్యవసర పరిస్థితిని ప్రకటించే స్థితికి చేరుకున్నాయి. అమెరికాలో కూడా పలు రాష్ట్రాల్లో 40 డిగ్రీల సెల్సియస్‌కు పైగా ఉష్ణోగ్రతలు నమోదవుతూ కరువు, అడవి మంటలు తీవ్రరూపం దాల్చుతున్నాయి. ఇలాంటి పరిస్థితుల్లో ప్రభుత్వాలు ముందస్తు చర్యలు తీసుకుని ప్రజలను అప్రమత్తం చేయాలని నిపుణులు సూచిస్తున్నారు.

ఈ నేపథ్యంలో ఐక్యరాజ్యసమితి ప్రధాన కార్యదర్శి ఆంటోనియో గుటెరస్ కూడా ఆందోళన వ్యక్తం చేశారు. "ఎల్‌నినో మన గుమ్మం వద్ద కాదు... ఇప్పటికే మన ఇంట్లోకి వచ్చేసింది. ఇది కేవలం ఆరంభం మాత్రమే" అని వ్యాఖ్యానించారు. వాతావరణ మార్పుల ప్రభావాన్ని తగ్గించేందుకు అన్ని దేశాలు సమన్వయంతో పనిచేయాలని, ప్రజలు కూడా వాతావరణ హెచ్చరికలను పాటిస్తూ అప్రమత్తంగా ఉండాలని ఆయన పిలుపునిచ్చారు.