దగ్గరుండి భర్తకు మూడో పెళ్లి చేసిన ఇద్దరు భార్యలు
ఎక్కడైనా భర్త వేరే అమ్మాయితో ఎఫైర్ పెట్టుకుంటేనే భార్యలు రగిలిపోతారు. అలాంటిది భర్త వేరే పెళ్లి చేసుకోవాలని చూస్తే.. ఇక సునామీనే. ఇది మనందరికీ తెలుసు. అయితే ఇప్పుడు ఓ ఇద్దరు భార్యలు మాత్రం దగ్గరుండి మరీ తమ భర్తకు మూడో పెళ్లి చేశారు. ఈ ఘటన అల్లూరి జిల్లా ఏజెన్సీలోని పెదబయలు మండలం గుల్లెలు పంచాయతీ కించూరు గ్రామంలో జరిగింది.
గ్రామానికి చెందిన పండన్న అనే వ్యక్తికి పార్వతమ్మతో మొదటి వివాహం జరిగింది. అయితే, పిల్లలు పుట్టలేదని అతను అప్పలమ్మను రెండో వివాహం చేసుకున్నాడు. వీరికి 2007లో ఓ బాబు పుట్టాడు. ఇలా ఇద్దరు భార్యలతో జీవనం సాగిస్తుండగా అతనికి రెండో సంతానం కావాలనుకున్నారు. ఈ క్రమంలోనే మాడుగుల మండలం కిల్లంకోట పంచాయతీ బందవీధికి చెందిన లక్ష్మిని ఇష్టపడ్డాడు.
ఈ విషయం భార్యలకు చెప్పగా.. వారు కూడా మూడో పెళ్లికి ఒప్పుకున్నారు. వారే స్వయంగా అమ్మాయి ఇంటికి వెళ్లి ఒప్పించారు. పెద్దలు అంగీకరించడంతో లక్ష్మిని పండన్నకు ఇచ్చి ఆ ఇద్దరు భార్యలే దగ్గరుండి వివాహం జరిపించారు. పెళ్లి పెద్దలు కూడా వారే అయ్యారు. ఈ ఘటన ఇప్పుడు రాష్ట్ర వ్యాప్తంగా ఆసక్తికరంగా మారిపోయింది.
Advertisement
