Suriya Jyothika Photos: సూర్య–జ్యోతిక తాజా ఫోటోషూట్ ప్రస్తుతం సోషల్ మీడియాలో తీవ్ర చర్చకు దారితీసింది. 'ది హాలీవుడ్ రిపోర్టర్ ఇండియా' ఆగస్టు సంచిక కోసం చేసిన ఈ ప్రత్యేక ఫోటోషూట్‌లో జ్యోతిక ఇచ్చిన కొన్ని పోజులు నెటిజన్లను ఆశ్చర్యానికి గురిచేశాయి. ఎన్నో ఏళ్లుగా హుందాతనానికి, సింప్లిసిటీకి గుర్తింపుగా నిలిచిన జ్యోతిక.. ఈసారి పూర్తిగా భిన్నమైన స్టైల్‌లో కనిపించడంతో సోషల్ మీడియాలో ట్రోలింగ్ మొదలైంది.

"జ్యోతికకు ఇలాంటి పోజులు అవసరమా?", "ఇన్నేళ్లుగా సంపాదించుకున్న ఇమేజ్‌ను ఇలాంటి ఫోటోషూట్‌లతో మార్చుకోవాల్సిన అవసరం ఏముంది?", "ఇలాంటి గ్లామర్ ప్రదర్శన జ్యోతిక నుంచి ఊహించలేదు" అంటూ పలువురు నెటిజన్లు విమర్శలు గుప్పిస్తున్నారు. మరికొందరు అయితే "ఇప్పటి వరకు సూర్య–జ్యోతిక జంటను కుటుంబ విలువలకు ప్రతీకగా చూశాం.. ఇప్పుడు ఇలాంటి ఫోటోలు ఆశ్చర్యపరుస్తున్నాయి" అంటూ కామెంట్లు చేస్తున్నారు. దీంతో ఈ ఫోటోషూట్ సోషల్ మీడియాలో హాట్ టాపిక్‌గా మారింది.

అయితే మరోవైపు అభిమానులలో మరో వర్గం మాత్రం జ్యోతికకు మద్దతుగా నిలుస్తోంది. ఇది ఒక ప్రత్యేక ముఖచిత్రం (కవర్ స్టోరీ) కోసం చేసిన ఫోటోషూట్ మాత్రమేనని, దీనిని అనవసరంగా విమర్శించడం సరికాదని అభిప్రాయపడుతున్నారు. నటీనటులు కథ, సందర్భం, ఫోటోగ్రఫీ కాన్సెప్ట్‌కు అనుగుణంగా వివిధ రకాల ఫోటోషూట్‌లు చేయడం సహజమేనని చెబుతున్నారు.

వాస్తవానికి ఈ ఫోటోలు 'ది హాలీవుడ్ రిపోర్టర్ ఇండియా' ఆగస్టు సంచికలో ప్రచురితమైన ప్రత్యేక కథనంలో భాగం. ఈ సందర్భంగా సూర్య–జ్యోతిక తమ 20 ఏళ్ల దాంపత్య జీవితం, సినీ ప్రయాణం, కుటుంబం, ఒకరిపై మరొకరికి ఉన్న నమ్మకం, భవిష్యత్తు ప్రణాళికల గురించి ఆసక్తికర విషయాలను పంచుకున్నారు. అయితే ప్రస్తుతం సోషల్ మీడియాలో వారి ఇంటర్వ్యూ కంటే జ్యోతిక ఫోటోషూట్ పోజుల గురించే ఎక్కువ చర్చ జరుగుతోంది.