గ్రూప్-1 ప్రిలిమ్స్ పరీక్ష ప్రాథమిక ‘కీ’ విడుదల

తెలంగాణలో ఈనెల 9న టీజీపీఎస్సీ 563 గ్రూప్‌-1 సర్వీసుల పోస్టులకు ప్రిలిమినరీ పరీక్ష నిర్వహించిన విషయం తెలిసిందే. పరీక్షకు మొత్తం 4.03 లక్షల మంది దరఖాస్తు చేయగా, 3.02 లక్షల మందికి పైగా పరీక్ష రాశారు. తాజాగా ఇవాళ(గురువారం) పరీక్ష ప్రాథమిక కీ విడుదల చేశారు.  ఈనెల 17 సాయంత్రం 5 గంటల వరకు వరకు దీనిపై ఏదైనా అభ్యంతరాలు ఉంటే స్వీకరిస్తామని కమిషన్ పేర్కొంది. 

ఇందుకోసం తొలుత టీజీపీఎస్సీ వెబ్‌సైట్‌లోని ప్రత్యేక లింక్‌ ద్వారా వ్యక్తిగత వివరాలను నమోదు చేయాలని సూచించారు. మరోవైపు టీజీపీఎస్సీ గ్రూప్‌-1 మెయిన్స్‌ పరీక్ష షెడ్యూల్‌ను విడుదల చేసింది. అక్టోబర్ 21 నుంచి ఆక్టోబర్‌ 27 వరకు వరుసగా పరీక్షలు నిర్వహిస్తామని తెలిపింది. పరీక్ష కేంద్రాలన్నీ హైదరాబాద్‌లోనే ఉంటాయని తెలిపింది. మధ్యాహ్నం 2:30 గంటల నుంచి సాయంత్రం 5:30 గంటల వరకు పరీక్షలు జరుగుతాయని, ప్రతీ పేపర్‌కు 150 మార్కులు ఉంటాయని వివరించింది. 

అక్టోబర్ 21న  జ‌న‌ర‌ల్ ఇంగ్లీష్‌(క్వాలిఫ‌యింగ్ టెస్ట్),  అక్టోబర్ 22న పేప‌ర్‌-1 (జ‌న‌ర‌ల్ ఎస్సే), 23న పేప‌ర్‌-2 (హిస్ట‌రీ, క‌ల్చ‌ర్ అండ్ జియోగ్ర‌ఫీ) – 24న పేప‌ర్‌-3 (ఇండియ‌న్ సొసైటీ, రాజ్యాంగం అండ్ గ‌వ‌ర్నెన్స్‌) 25న పేప‌ర్‌-4 (ఎకాన‌మి అండ్ డెవ‌ల‌ప్‌మెంట్), 25న పేప‌ర్‌-5 (సైన్స్ అండ్ టెక్నాల‌జీ అండ్ డాటా ఇంట‌ర్‌ప్రిటేష‌న్), 26న పేప‌ర్‌-6 (తెలంగాణ మూవ్‌మెంట్ అండ్ స్టేట్ ఫార్మేష‌న్)  నిర్వహించనున్నట్లు పేర్కొంది.