ఇవాళ దివంగత నందమూరి తారక రామారావు 101వ జయంతి సందర్భంగా ఆయన అభిమానులు, కుటుంబ సభ్యలు ఆయనను తలుచుకుంటూ నివాళులు అర్పిస్తున్నారు. తాజాగా ఆయన మనవళ్లు జూనియర్ ఎన్టీఆర్, కళ్యాణ్ రామ్ ఉదయాన్నే హైదరాబాద్‌లోని ఎన్టీఆర్ ఘాట్ వద్దకు చేరుకొని నివాళులు అర్పించారు. 

తాతకు తగ్గ మనవడుగా జూనియర్ ఎన్టీఆర్ సినీ రంగంలో దూసుకుపోతున్నారు. కాగా, ప్రపంచ స్థాయిలో ఎన్టీఆర్ గుర్తింపు సాధించారు. ప్రస్తుతం వరుస సినిమాలతో దూసుకుపోతున్న ఎన్టీఆర్ తన తాతయ్య జయంతి సందర్భంగా స్పెషల్ ట్వీట్ చేశారు. ‘మీ పాదం మోపక తెలుగు ధరిత్రి చిన్నబోతుంది. మీ రూపు కానక తెలుగు గుండె తల్లడిల్లిపోతుంది. పెద్ద మనసుతో ఈ ధరిత్రిని, ఈ గుండెను, మరొక్కసారి తాకిపో తాత సదా మీ ప్రేమకు బానిసను’. అంటూ ఎన్టీఆర్ ట్వీట్ చేశారు. ప్రస్తుతం ఈ ట్వీట్ సోషల్ మీడియాలో వైరల్ అవుతోంది.

యంగ్ టైగర్ ఎన్టీఆర్ 'ఆర్ఆర్ఆర్' సినిమాతో గ్లోబల్ ఇమేజ్ సంపాదించుకున్నాడు. స్టార్ క్రికెటర్స్, హాలీవుడ్ ప్రముఖులు సైతం ఎన్టీఆర్ టాలెంట్‌కు ఫిదా అవుతున్నారు. తాజాగా తారక్ గురించి.. స్టార్ క్రికెటర్ విరాట్ కోహ్లీ చేసిన కామెంట్స్ హాట్ టాపిక్‌గా మారాయి. తెలుగు హీరోల్లో ఎన్టీఆర్ తనకు మంచి ఫ్రెండ్ అని, నటుడిగానూ ఎంతో అభిమానిస్తానని కోహ్లీ తెలిపాడు.

‘ఓ యాడ్‌లో కలిసి నటించినప్పుడు అతని వ్యక్తిత్వానికి ఫిదా అయ్యా. ఆర్‌ఆర్‌ఆర్‌లో ఎన్టీఆర్ నటనను వర్ణించడానికి మాటలు సరిపోవు. ‘నాటు నాటు’ పాటకు డాన్స్ ఎంతో ఆకట్టుకుంది. నా భార్య అనుష్కతో కలిసి ఆ పాటకు రీల్స్ చేశా. ఈ సినిమాకు ఆస్కార్ వచ్చిందని తెలిసి వెంటనే ‘నాటు నాటు’ పాటకు గ్రౌండ్‌లో డాన్స్ వేశా’ అని విరాట్ చెప్పుకొచ్చాడు.

కాగా, ప్రస్తుతం కోహ్లీ వరల్డ్‌లోనే టాప్ క్రికెటర్‌గా వెలుగొందుతున్నాడు. అలాంటి కోహ్లీ.. ఎన్టీఆర్ తనకు ఫ్రెండ్ అని, అతని యాక్టింగ్ అంటే ఇష్టమని చెప్పడంతో.. తారక్ అభిమానులు ఫుల్ ఖుషీ అవుతున్నారు. ఎన్టీఆర్ గురించి విరాట్ చేసిన కామెంట్స్ ప్రస్తుతం సోషల్ మీడియాలో తెగ వైరల్ అవుతున్నాయి.