Komatireddy Rajagopal Reddy: ఇందిరమ్మ ఇళ్ల పథకానికి ప్రభుత్వం అందిస్తున్న నిధులపై మునుగోడు ఎమ్మెల్యే కోమటిరెడ్డి రాజగోపాల్ రెడ్డి కీలక వ్యాఖ్యలు చేశారు. పేదల ఇళ్ల నిర్మాణానికి ప్రభుత్వం ఇస్తున్న రూ.5 లక్షలు ప్రస్తుత నిర్మాణ వ్యయాలకు సరిపోవడం లేదని అన్నారు. ఈ విషయంలో ప్రభుత్వం మరోసారి ఆలోచించి నిధులను పెంచాల్సిన అవసరం ఉందని సూచించారు.

ఇల్లు నిర్మించుకోవాలంటే ప్రస్తుతం దాదాపు రూ.10 లక్షల నుంచి రూ.15 లక్షల వరకు ఖర్చు అవుతోందని రాజగోపాల్ రెడ్డి తెలిపారు. ప్రభుత్వం అందించే రూ.5 లక్షలు ఇంటి నిర్మాణంలో మేస్త్రీ ఖర్చులకే సరిపోతున్నాయని అన్నారు. దీంతో పేద కుటుంబాలు మిగిలిన మొత్తాన్ని సమకూర్చుకోవడానికి తీవ్ర ఇబ్బందులు పడుతున్నాయని పేర్కొన్నారు.

గ్రామాల్లో పేదలు ఇళ్ల నిర్మాణం కోసం అప్పులు తెచ్చుకుంటున్నారని, కొందరు తమ వద్ద ఉన్న బంగారాన్ని అమ్ముకుంటున్నారని రాజగోపాల్ రెడ్డి తెలిపారు. తాను చెబుతున్నది కేవలం రాజకీయ విమర్శ కాదని, గ్రామాల్లో ప్రజలు ఎదుర్కొంటున్న వాస్తవ సమస్య అని స్పష్టం చేశారు.

ఇందిరమ్మ ఇళ్ల పథకాన్ని మరింత సమర్థవంతంగా అమలు చేయాలంటే ప్రభుత్వం అందించే ఆర్థిక సాయాన్ని పెంచాలని రాజగోపాల్ రెడ్డి కోరారు. పేద కుటుంబాలపై అదనపు ఆర్థిక భారం పడకుండా ప్రభుత్వం నిర్మాణ వ్యయాలకు అనుగుణంగా నిధులను పెంచే అంశాన్ని పరిశీలించాలని సూచించారు.

Ponguleti Srinivas Reddy: తెలంగాణలో ఇందిరమ్మ ఇళ్ల నిర్మాణంపై రాష్ట్ర ప్రభుత్వం దృష్టి సారించింది. దసరా నాటికి తొలి విడతలో 4 లక్షల 20 వేల ఇందిరమ్మ ఇళ్ల నిర్మాణాలను పూర్తి చేయనున్నట్లు శాసన మండలిలో మంత్రి పొంగులేటి శ్రీనివాసరెడ్డి వెల్లడించారు. ఇళ్ల నిర్మాణం పూర్తవుతున్న లబ్ధిదారులందరికీ ఆయన హృదయపూర్వక శుభాకాంక్షలు తెలిపారు.

రాష్ట్రంలో పేద, మధ్యతరగతి కుటుంబాలకు సొంత ఇంటి కలను సాకారం చేసే లక్ష్యంతో ఇందిరమ్మ ఇళ్ల కార్యక్రమాన్ని ప్రభుత్వం అమలు చేస్తోందని మంత్రి పేర్కొన్నారు. ఇళ్ల నిర్మాణ పనులను వేగవంతం చేసి.. లబ్ధిదారులకు త్వరగా ఇళ్లను అందించేలా చర్యలు తీసుకుంటున్నట్లు తెలిపారు.

ఇదిలా ఉండగా.. ప్రస్తుతం రాష్ట్రవ్యాప్తంగా 3.28 లక్షల ఇందిరమ్మ ఇళ్ల నిర్మాణ పనులు వివిధ దశల్లో కొనసాగుతున్నట్లు ప్రభుత్వం తెలిపింది. వీటిలో సుమారు 1.97 లక్షల ఇళ్లు నిర్మాణం పూర్తయ్యే దశకు చేరుకున్నట్లు పేర్కొంది. నిర్మాణ పనులను మరింత వేగవంతం చేసి నిర్ణీత గడువులోగా ఇళ్లను పూర్తి చేయాలని అధికారులు చర్యలు చేపడుతున్నారు.

దసరా పండుగ నాటికి తొలి విడతలో లక్షలాది కుటుంబాలకు సొంత ఇంటి కలను నెరవేర్చే దిశగా ప్రభుత్వం ముందుకు సాగుతోందని మంత్రి తెలిపారు. ఇళ్ల నిర్మాణానికి సంబంధించిన పనులు, నిధుల విడుదల, నిర్మాణ పురోగతిని ఎప్పటికప్పుడు పర్యవేక్షిస్తున్నట్లు వెల్లడించారు. అర్హులైన లబ్ధిదారులకు ఇబ్బందులు లేకుండా నిర్మాణ ప్రక్రియను పూర్తి చేసేలా చర్యలు తీసుకుంటున్నట్లు చెప్పారు.

ఇందిరమ్మ ఇళ్ల పథకం ద్వారా పేద కుటుంబాలకు సొంత ఇంటి సౌకర్యం కల్పించడంతో పాటు.. వారి జీవన ప్రమాణాలను మెరుగుపరిచే లక్ష్యంతో ప్రభుత్వం పనిచేస్తోందని మంత్రి పేర్కొన్నారు. ఇళ్ల నిర్మాణం పూర్తయిన కుటుంబాలకు దసరా నాటికి ఇళ్లను అందుబాటులోకి తీసుకురావడం ద్వారా వారికి పండుగ ఆనందాన్ని మరింత పెంచాలని ప్రభుత్వం భావిస్తోంది.

Kalyana Lakshmi Scheme: కళ్యాణలక్ష్మీ పథకం లబ్ధిదారులకు రెండేళ్లుగా ఎదురుచూపులు తప్పడం లేదు. పెళ్లి జరిగి రెండేళ్లు పూర్తయినా ఇప్పటివరకు కళ్యాణలక్ష్మీ చెక్కు అందలేదని లబ్ధిదారులు ఆవేదన వ్యక్తం చేస్తున్నారు. తాజాగా నిన్న చెక్కు వచ్చిందంటూ ఎమ్మార్వో కార్యాలయం నుంచి లబ్ధిదారులకు ఫోన్ వచ్చింది. దీంతో ఎంతో ఆశతో చెక్కు తీసుకునేందుకు కార్యాలయానికి వెళ్లిన లబ్ధిదారులకు అక్కడ అధికారుల నుంచి ఊహించని సమాధానం ఎదురైంది.

కళ్యాణలక్ష్మీ చెక్కు ఇవ్వడానికి కోర్టు స్టే ఉందని, ప్రస్తుతం చెక్కు అందించలేమని అధికారులు చెప్పినట్లు లబ్ధిదారులు తెలిపారు. రెండేళ్లుగా పథకం డబ్బుల కోసం ఎదురుచూస్తున్న తమకు చెక్కు వచ్చిందనే సమాచారంతో కొంత ఊరట కలిగిందని, కానీ కార్యాలయానికి వెళ్లిన తర్వాత కూడా చెక్కు అందకపోవడంతో తీవ్ర నిరాశకు గురయ్యామని వారు వాపోయారు.

పేద కుటుంబాలకు ఆర్థికంగా అండగా నిలిచేందుకు ప్రభుత్వం అమలు చేస్తున్న కళ్యాణలక్ష్మీ పథకం కింద తమకు రావాల్సిన సాయం కోసం ఇంతకాలం ఎదురుచూస్తున్నామని లబ్ధిదారులు తెలిపారు. చెక్కు సిద్ధంగా ఉందని సమాచారం ఇచ్చిన తర్వాత కూడా కోర్టు స్టే కారణంగా ఇవ్వలేమని చెప్పడం తమను మరింత ఇబ్బందికి గురిచేసిందని ఆవేదన వ్యక్తం చేశారు. రెండేళ్లుగా పెండింగ్‌లో ఉన్న తమ కళ్యాణలక్ష్మీ సాయాన్ని వీలైనంత త్వరగా అందేలా అధికారులు చర్యలు తీసుకోవాలని లబ్ధిదారులు కోరుతున్నారు.

కోర్టు స్టేకు సంబంధించిన పూర్తి వివరాలను అధికారులు స్పష్టంగా తెలియజేయాలని, లబ్ధిదారులకు ప్రత్యామ్నాయంగా ఎప్పుడు సాయం అందుతుందో చెప్పాలని వారు కోరుతున్నారు. ఎన్నో ఆశలతో కార్యాలయానికి వచ్చిన తమకు మరోసారి నిరాశ ఎదురుకాకుండా ప్రభుత్వం, ఉన్నతాధికారులు వెంటనే స్పందించి సమస్యను పరిష్కరించాలని లబ్ధిదారులు విజ్ఞప్తి చేస్తున్నారు.

ETALA RAJENDER NEWS:  బీజేపీ ఎంపీ ఈటల రాజేందర్ రాష్ట్ర ప్రభుత్వంపై తీవ్ర విమర్శలు చేశారు. తెలంగాణలో హైడ్రా (HYDRAA) వ్యవహారంపై ఆయ‌న మండి ప‌డ్డారు. హైడ్రా అనేది ప్రజలను వేధించే సంస్థగా మారిందని ఆరోపించారు. ప్రభుత్వం అధికారులను నియమించే విచక్షణాధికారం కలిగి ఉండొచ్చని, అయితే ప్రజల ఇళ్లను కూల్చివేసే అధికారం ఎవరికీ లేదని అన్నారు. ముఖ్యమంత్రి రేవంత్ రెడ్డి హిట్లర్‌ను ఆదర్శంగా తీసుకుని హైడ్రాను ఏర్పాటు చేశారని ఈటల రాజేందర్ ఆరోపించారు. హిట్లర్ ప్రజలను ఎలా వేధించాడో, అదే విధంగా హైడ్రా పేరుతో రాష్ట్ర ప్రభుత్వం ప్రజలను ఇబ్బందులకు గురి చేస్తోందని విమర్శించారు. ప్రస్తుతం ప్రజల్లో హైడ్రా అంటే భయాందోళనలు నెలకొన్నాయని, పేదల ఇళ్లను కూల్చివేసే సంస్థగా ప్రజలు భావిస్తున్నారని పేర్కొన్నారు.

వ్య‌తిరేకంగా మాట్లాడితే బ్లాక్‌మొయిల్ చేస్తారా?

అంతేకాకుండా, తమకు అనుకూలంగా ఉన్న వారికి భూములు కట్టబెట్టేందుకు, వ్యతిరేకంగా మాట్లాడే వారిని బ్లాక్‌మెయిల్ చేయడానికే హైడ్రాను ప్రభుత్వం ఉపయోగిస్తోందని ఆరోపించారు. హైడ్రా చర్యల కారణంగా హైదరాబాద్‌లో ఇల్లు కొనాలన్నా ప్రజలు భయపడే పరిస్థితి ఏర్పడిందని అన్నారు. ప్రభుత్వ చర్యల వల్ల రియల్ ఎస్టేట్ రంగంపైనా ప్రతికూల ప్రభావం పడుతోందని వ్యాఖ్యానించారు. హైడ్రా పేరుతో జరుగుతున్న చర్యలను ప్రభుత్వం పునఃసమీక్షించాలని ఈటల రాజేందర్ డిమాండ్ చేశారు. ప్రజల ఆస్తులు, హక్కులను పరిరక్షించే విధంగా ప్రభుత్వం వ్యవహరించాలని సూచించారు.

Hyderabad Metro: హైదరాబాద్ మెట్రో ఫేజ్-1 స్వాధీన ప్రక్రియలో ప్రభుత్వం మళ్లీ మొదటికొచ్చింది. ఎల్‌అండ్‌టీ యాజమాన్యం నుంచి మెట్రో ప్రాజెక్టును టేకోవర్ చేసుకునేందుకు చేపట్టిన చర్యలకు ఐఆర్‌ఎఫ్‌సీ (IRFC) రూపంలో ఊహించని బ్రేక్ పడింది. ఇండియన్ రైల్వే ఫైనాన్స్ కార్పొరేషన్ నుంచి లభించాల్సిన రుణం ఆగిపోవడంతో మెట్రో టేకోవర్ వ్యవహారం పూర్తిగా ఆగిపోయింది. నిధుల సమీకరణలో ఏర్పడిన ఈ ఆటంకం ప్రాజెక్టు బదిలీ ప్రక్రియను మళ్లీ మొదటికి తెచ్చిపెట్టింది.

ఐఆర్‌ఎఫ్‌సీ నుంచి ఆర్థిక సాయం నిలిచిపోవడంతో రాష్ట్ర ప్రభుత్వం ప్రత్యామ్నాయ రుణాల కోసం అన్వేషణ ప్రారంభించింది. మెట్రో స్వాధీనానికి అవసరమైన నిధుల కోసం ఆర్థిక శాఖ అధికారులు ప్రస్తుతం పలు ప్రముఖ బ్యాంకులను సంప్రదిస్తున్నారు. ఒప్పందంలో భాగంగా ఎల్‌అండ్‌టీ సంస్థకు ప్రభుత్వం ఇప్పటికే రూ.1,440 కోట్లు చెల్లించినప్పటికీ, నిధుల కొరత కారణంగా తదుపరి ప్రక్రియ నిలిచిపోయింది. వాణిజ్య బ్యాంకుల నుంచి సకాలంలో రుణాలు మంజూరవుతాయా లేదా అనే అంశంపై అధికార వర్గాలు సమీక్ష నిర్వహిస్తున్నాయి.

మరోవైపు రూ.13,600 కోట్ల భారీ రుణ బదిలీ వ్యవహారం ప్రభుత్వం ముందు పెద్ద సవాలుగా మారింది. ఈ అప్పుల బాధ్యతను బదిలీ చేసే అంశంపై ప్రభుత్వం, ఎల్‌అండ్‌టీ ప్రతినిధుల మధ్య ఒప్పందం కుదరడం లేదు. భారీ మొత్తంలో ఉన్న ఈ రుణ బదిలీపై స్పష్టమైన కార్యాచరణ లేకపోవడంతో టేకోవర్ ప్రక్రియ ముందుకు సాగడం లేదు. అధికారుల స్థాయి చర్చలు జరుగుతున్నప్పటికీ రుణ బదిలీపై ఎలాంటి తుది నిర్ణయం తీసుకోలేకపోయారు.

టేకోవర్ ప్రక్రియలో జరుగుతున్న జాప్యం వల్ల ప్రభుత్వంపై తీవ్ర ఆర్థిక భారం పడుతోంది. మెట్రో స్వాధీనం ఆలస్యమవుతున్న కొద్దీ రోజుకు రూ.2.5 కోట్ల నుంచి రూ.3 కోట్ల వరకు వడ్డీ రూపంలో అదనపు భారం పడుతున్నట్లు సమాచారం. గడిచిన రెండు నెలల వ్యవధిలోనే ప్రభుత్వంపై దాదాపు రూ.150 కోట్ల నుంచి రూ.180 కోట్ల వరకు అదనపు భారం పడినట్లు తెలుస్తోంది. వెంటనే రుణాల సమీకరణ పూర్తి చేసి టేకోవర్ ప్రక్రియను ముగించకపోతే ఖజానాపై మరింత భారం పడే ప్రమాదం ఉంది.

 విశ్వంభర తెలంగాణ, బ్యూరో : ఇందిరమ్మ ఇళ్ల లబ్ధిదారులకు తెలంగాణ ప్రభుత్వం శుభవార్త చెప్పింది. ఇళ్ల నిర్మాణానికి సంబంధించిన బిల్లుల మంజూరుపై కీలక నిర్ణయం తీసుకుంది. ఇకపై ఇందిరమ్మ ఇళ్ల పనులకు ప్రతి వారం బిల్లులు క్లియర్ చేస్తామని డిప్యూటీ సీఎం భట్టి విక్రమార్క ప్రకటించారు. లబ్ధిదారులు ఆలస్యం చేయకుండా ఇళ్ల నిర్మాణాన్ని వేగంగా పూర్తి చేసుకోవాలని సూచించారు. అలాగే, బిల్లుల చెల్లింపుల్లో ఎలాంటి జాప్యం లేకుండా చర్యలు తీసుకోవాలని అధికారులను ఆదేశించారు. ఇప్పటివరకు నిధుల లభ్యతను బట్టి సోమవారాల్లో బిల్లులు మంజూరు చేస్తూ వచ్చిన ప్రభుత్వం, ఇప్పుడు ఈ ప్రక్రియను మరింత వేగవంతం చేసింది.

ఈ సందర్భంగా డిప్యూటీ సీఎం మాట్లాడుతూ.. తమ ప్రభుత్వం ప్రతి నియోజకవర్గానికి 3,500 ఇందిరమ్మ ఇళ్లను కేటాయించిందని తెలిపారు. ఈ పథకానికి మొత్తం రూ.22,500 కోట్ల వ్యయం చేస్తున్నట్లు వెల్లడించారు. స్వంత స్థలం ఉన్న అర్హులైన లబ్ధిదారులకు ఇల్లు నిర్మించుకునేందుకు రూ.5 లక్షల వరకు ఆర్థిక సహాయం అందిస్తున్నామని చెప్పారు. ఇందిరమ్మ ఇళ్ల పట్టాల పంపిణీ కార్యక్రమంలో పాల్గొన్న ఆయన, గోదావరిఖనిలో పర్యటించి రామగుండం మున్సిపల్ కార్పొరేషన్ పరిధిలో రూ.175 కోట్ల విలువైన అభివృద్ధి పనులకు శంకుస్థాపన చేశారు.

ప్రతి పేద కుటుంబానికి సొంతింటి కలను నెరవేర్చాలన్న లక్ష్యంతో రేవంత్ రెడ్డి నేతృత్వంలోని ప్రభుత్వం పనిచేస్తోందని భట్టి విక్రమార్క స్పష్టం చేశారు. ఆ లక్ష్యానికి అనుగుణంగానే కాంగ్రెస్ ప్రభుత్వం ఇందిరమ్మ ఇళ్ల పథకాన్ని అత్యంత ప్రతిష్టాత్మకంగా అమలు చేస్తోందని అన్నారు. ఇప్పటికే ఈ పథకం కింద దశల వారీగా లబ్ధిదారులను గుర్తించి ఇళ్ల మంజూరు ప్రక్రియ కొనసాగుతోంది.

ఇదిలా ఉండగా, రెండో విడత ఇందిరమ్మ ఇళ్ల పంపిణీకి ప్రభుత్వం ముందస్తు సన్నాహాలు చేస్తోంది. 2026 ఏప్రిల్ నుంచి ఈ రెండో దశ ప్రారంభం కానుంది. ఈ విడతలో మధ్యతరగతి కుటుంబాలకు కూడా ప్రత్యేకంగా ఇళ్లను కేటాయించేందుకు ప్రణాళికలు రూపొందిస్తున్నారు. పట్టణ ప్రాంతాల్లో జీ ప్లస్ త్రీ, జీ ప్లస్ ఫోర్ నమూనాలో బహుళ అంతస్తుల భవనాల నిర్మాణానికి ప్రభుత్వం సిద్ధమవుతోంది.

మరోవైపు, రెండో విడత ఇందిరమ్మ ఇళ్ల నిర్మాణ పథకాన్ని వేగంగా అమలు చేయడానికి అవసరమైన విధివిధానాలపై అధికారులు కసరత్తు చేస్తున్నారు. మున్సిపల్ ఎన్నికల కోడ్ అమల్లోకి రాకముందే ఈ పథకానికి సంబంధించిన నోటిఫికేషన్ జారీ చేయాలని ప్రభుత్వం యోచిస్తున్నట్లు సమాచారం. రాష్ట్రవ్యాప్తంగా సుమారు 4 లక్షల 50 వేల ఇళ్ల నిర్మాణం చేపట్టాలని లక్ష్యంగా పెట్టుకున్న ప్రభుత్వం, ప్రతి నియోజకవర్గానికి మరోసారి 3,500 చొప్పున ఇళ్ల మంజూరుకు కార్యాచరణ ప్రణాళికను సిద్ధం చేస్తోంది.

తెలంగాణ ప్రభుత్వం కీలక నిర్ణయం తీసుకుంది. భూములు, స్థిరాస్తుల విలువను పెంచనుంది. భూముల మార్కెట్ వాస్తవ ధర, ప్రభుత్వ ధరకు వ్యత్యాసం ఉండటంతో ఈ నిర్ణయం తీసుకున్నట్లు తెలుస్తోంది. ఈ మేరకు మార్కెట్ విలువలను సవరించేందుకు ప్రభుత్వం వేగంగా అడుగులు వేస్తోంది. ఈ మేరకు రాష్ట్రంలో ఆగస్టు 1వ తేదీ నుంచి వ్యవసాయ, వ్యవసాయేతర భూములు, స్థిరాస్తుల కొత్త రిజిస్ట్రేషన్ల ఛార్జీలను అమల్లోకి తేనుంది.

రాష్ట్రంలో భూముల మార్కెట్‌ విలువలను సవరించేందుకు రేవంత్ ప్రభుత్వం ఇటీవలే నిర్ణయం తీసుకుంది. ఈ నెల 18న అదనపు కలెక్టర్లు, ఆర్డీవోలతో ఈ శాఖ అధికారులు ప్రైమరీ సమావేశాన్ని నిర్వహించారు. దశల వారీగా భూముల ధరలను పరిశీలన పూర్తి చేసి జులై 1వ తేదీన కొత్త రిజిస్ట్రేషన్‌ ఛార్జీలను ఫైనల్ చేయాలని ఆదేశించారు. ఈ మేరకు ఈనెల 23 వరకు మార్కెట్ విలువను సవరణ చేయనున్నారు. మరుసటి రోజు (జూన్ 29) నాటికి కమిటీ ఆమోదం వేయనుంది. ఆ తర్వాత జులై 20 వరకు సలహాలు, సూచనలు, అభ్యంతరాల స్వీకరణ తీసుకొని వాటికి పరిష్కారం చూపనున్నారు. 

సవరించిన ధరలు ఆగస్టు 1వ తేదీ నుంచి అమల్లోకి రానున్నాయి. గ్రామీణ ప్రాంతాల్లో జాతీయ, రాష్ట్ర రహదారుల్లో ఉన్న గ్రామాలను ముందుగా గుర్తించి వ్యవసాయేతర వినియోగానికి అనువైన ప్రాంతాలు, పరిశ్రమలు, సెజ్‌లు తదితర ప్రాంతాలను పరిగణనలోకి తీసుకుంటారు. పురపాలక సంఘాలు, కార్పొరేషన్లలో స్థానిక ప్రాంతాలను ఆధారంగా చేసుకొని విలువను నిర్ధారిస్తారు. రెవెన్యూ, పంచాయతీ అధికారుల సూచనలు తీసుకుని బహిరంగ మార్కెట్‌ ధరలపై అధికారులు అంచనాకు వస్తారు. కమర్షియల్ ఏరియాలు, మెయిన్ రోడ్స్ లాంటి ఏరియాల్లో ఆ ప్రాంతానికి అనుగుణంగా మార్కెట్ విలువను నిర్ణయిస్తారు.

ఈనాడు సంస్థల అధిపతి రామోజీరావు మృతిపట్ల పలువురు సినీ, రాజకీయ ప్రముఖులు సంతాపం వ్యక్తం చేస్తున్నారు. ఈ నేపథ్యంలో తెలంగాణ ప్రభుత్వం కీలక నిర్ణయం తీసుకుంది. రామోజీరావు అంత్యక్రియలను అధికారిక లాంఛనాలతో నిర్వహిస్తున్నట్లు ప్రకటించింది. అంత్యక్రియలకు సంబంధించిన ఏర్పాట్లు చేయాలని ప్రభుత్వ ప్రధాన కార్యదర్శికి సీఎం రేవంత్‌ ఆదేశాలు జారీచేశారు. ఏర్పాట్లు పర్యవేక్షించాల్సింగా రంగారెడ్డి కలెక్టర్‌, సైబరాబాద్‌ కమిషనర్‌కు సీఎస్‌ ద్వారా రేవంత్ ఆదేశించారు.ఓమీడియాదిగ్గజానికి అధికార లాంఛనాలతో అంత్యక్రియలు జరపడం దేశంలో ఇదే మొదటిసారి. 

ఇదిలా ఉండగా, రామోజీరావు భౌతికకాయానికి ఎప్పుడు అంత్యక్రియలు నిర్వహిస్తారనేది తెలియాల్సివుంది. ఆయన కుటుంబసభ్యులు ప్రస్తుతం విదేశాల్లో ఉన్నారు. వారంతా హైదరాబాద్ చేరుకున్న తర్వాతే అంత్యక్రియలను నిర్వహించనున్నట్లు తెలుస్తోంది. రామోజీరావు కుమారుడు, ఆయన కోడలు, మనవడు, మనవళ్లు విదేశాల్లోనే ఉన్నారు. వారంతా హైదరాబాద్‌ చేరుకున్న తర్వాత అంత్యక్రియలను నిర్వహించనున్నట్లు సమాచారం. ఫిలిసిటీలోనే రామోజీరావు అంత్యక్రియలు జరుగుతాయని ఆయన సన్నిహితులు తెలిపారు. ఆయన తాను ఇష్టపడి నిర్మించుకున్న ఫిలింసిటీలోనే అంత్యక్రియలు నిర్వహించాలని కుటుంబసభ్యులు నిర్ణయం తీసుకున్నారు.

విశ్వంభర : హైదరాబాద్‌లో చేప మందు ప్రసాదాన్ని ఉచితంగా పంపిణీ చేసేందుకు విస్తృత ఏర్పాట్లు జరుగుతున్నాయి. మృగశిరకార్తె ప్రారంభం కానున్నందున ఈనెల 8వ తేదీ నుంచి నాంపల్లిలోని ఎగ్జిబిషన్ గ్రౌండ్‌లో చేపల ప్రసాదం పంపిణీ చేయనున్నారు.ఎగ్జిబిషన్ గ్రౌండ్లో  నాంపల్లి లో జరిగే చేప ప్రసాద పంపిణి ఏర్పాట్లను ఫిషరీస్ కార్పొరేషన్ చైర్మన్ మెట్టు సాయికుమార్ , ఫిషరీస్ జాయింట్ కమీషనర్ శంకర్ రాథోడ్ మరియు ఏసీపీ చంద్రశేఖర్ లతో  కలిసి పర్యవేక్షించారు . ఈ సందర్భముగా మాట్లాడుతూ బత్తిన కుటుంబ సభ్యుల  ఆధ్వర్యంలో ప్రతి సంవత్సరం ఈ కార్యక్రమాన్ని పెద్ద ఎత్తున నిర్వహిస్తారని , ఈ మందు దివ్యౌషదంలా పనిచేస్తుందని తెలుగు రాష్ట్రాల ప్రజల విశ్వాసం అని తెలిపారు . దీంతో తెలంగాణ, ఏపీతో పాటు మహారాష్ట్ర, కర్ణాటక రాష్ట్రాల నుంచి పెద్ద ఎత్తున జనం తరలివస్తుంటారని . ఈ మేరకు నాంపల్లి ఎగ్జిబిషన్ గ్రౌండ్స్‌లో ప్రత్యేక  కౌంటర్లు ఏర్పాటు చేసి సీక్వెన్షియల్ ఆర్డర్‌లో ఈ మందును అందజేసే విధంగా తగు జాగ్రత్తలు తీసుకుంటున్నామని పేర్కొన్నారు

తెలంగాణ ప్రభుత్వం సంచలన నిర్ణయం తీసుకుంది. గుట్కాను నిషేధించాల‌ని కాంగ్రెస్ సర్కార్ నిర్ణ‌యించింది. ఈ మేర‌కు గుట్కా తయారీ, అమ్మ‌కాల‌పై నిషేధం విధిస్తూ ఫుడ్ సేఫ్టీ అధికారులు ఉత్త‌ర్వులు జారీ చేశారు. ఈ ఏడాది మే 24 నుంచి ఏడాది కాలం పాటు ఈ నిబంధ‌న‌లు అమ‌ల్లో ఉంటాయ‌ని స్ప‌ష్టం చేశారు. గుట్కా, పాన్ మాసాల‌లో ఆరోగ్యానికి హాని క‌లిగించే పొగాకు, నికోటిన్ ఉండ‌డం మూలంగానే వాటిని నిషేధించిన‌ట్లు పేర్కొన్నారు. 

గుట్కాను త‌యారు చేసినా, నిల్వ ఉంచినా, విక్ర‌యాలు జ‌రిపినా చ‌ట్ట‌ప‌ర‌మైన చ‌ర్య‌లు తీసుకుంటామ‌ని అధికారులు హెచ్చ‌రించారు. అటు యువతపై ప్రభావం చూపుతున్న మాదకద్రవ్యాలపై ఇప్పటికే ప్రభుత్వం ఉక్కుపాదం మోపుతోంది. ఈ క్రమంలోనే తాజాగా.. తెలంగాణ రాష్ట్రంలో గుట్కా తయారీ, అమ్మకంను నిషేదిస్తూ ప్రభుత్వం నిర్ణయం తీసుకుంది. దీనికి సంబంధించిన ఉత్తర్వులను ఫుడ్ సేఫ్టీ కమిషనర్ జారీ చేశారు. 

ఆ ఉత్తర్వులో ఆహార భద్రత, ప్రమాణాల చట్టం, 2006లోని సెక్షన్ 30 లోని సబ్-సెక్షన్ (2)లోని క్లాజ్ (a) కింద అందించబడిన అధికారాలను అమలు చేస్తున్నట్లు పేర్కొన్నారు. 2011 ప్రజారోగ్య దృష్ట్యా, తెలంగాణ రాష్ట్ర ఆహార భద్రత కమిషనర్, పొగాకు, నికోటిన్‌లను పొగాకు, పౌచ్‌లు, ప్యాకేజీ, టెయినర్లు తదితర వాటిలో ప్యాక్ చేసిన గుట్కా, పాన్‌మసాలా తయారీ, నిల్వ, పంపిణీ, రవాణా, విక్రయాలను నిషేధించారు. ఈ నిషేధం 24 మే 2024 నుంచి తెలంగాణ రాష్ట్రం మొత్తం అమలులో ఉంటుందని ఉత్తర్వుల్లో పేర్కొన్నారు.