వరంగల్ జిల్లాలో ఓ ప్రేమ జంట ఆత్మహత్యాయత్నం చేసుకున్నారు. వరంగల్ అండర్ బ్రిడ్జ్ సమీపంలోని ఏడు మోరీల దగ్గర రైలు పట్టాలపై పడి ఆత్మహత్యకు పాల్పడ్డారు. ఈ ఘటనలో యువతి మృతి చెందగా.. యువకుడి పరిస్థితి విషమంగా ఉంది. తీవ్ర గాయాలతో ఉన్న యువకుడిని ఎంజీఎం ఆసుపత్రికి తరలించి చికిత్స అందిస్తున్నారు. దీనిపై విచారణ జరిపిన పోలీసులు యువతి పేరు సుష్మగా, యువకుడి పేరు చెన్నకేశవగా గుర్తించారు.  

అయితే.. ఈ కేసులో సంచలన విషయాలు బయటకు వస్తున్నాయి. ఖమ్మం సారధి నగర్‌కు చెందిన 17 ఏళ్ల యువతి సుష్మ, వరంగల్ కాశిబుగ్గకు చెందిన చెన్నకేశవ అనే యువకుడు కొన్ని నెలలుగా ప్రేమించుకుంటున్నారు. నాలుగు రోజుల క్రితం ఈ ఇద్దరు ఇంట్లో చెప్పకుండా వెళ్లిపోయారు. యువతి తల్లిదండ్రులు, బంధువులు ఆమె కోసం గాలించారు. చివరికి ఆమె ఆచూకీ కనిపించకపోవడంతో.. ఖమ్మం 3 టౌన్ పోలీస్ స్టేషన్‌లో ఫిర్యాదు చేశారు. పోలీసులు మిస్సింగ్ కేసు నమోదు చేశారు. 

ఈ ఘటనకు కారణం ఆత్మహత్యాయత్నమా? మరేదైనా కారణం ఉందా అన్న కోణంలో పోలీసుల విచారణ చేస్తున్నారు. ఈ కేసులో పలు అనుమానాలు వ్యక్తం అవుతున్నాయి. ఈ ప్రేమ వ్యవహారం ఇంట్లో తెలుసా? లేదా? అనే దానిపై కూడా పోలీసులు దర్యాప్తు చేస్తున్నారు. సుష్మ మృతదేహాన్ని వరంగల్ ఎంజీఎం మార్చురీకి తరలించి కేసు నమోదు చేసుకుని దర్యాప్తు నిర్వహిస్తున్నారు.